30:168  pant  inter  se  ad  magnos  honores  evehi,  et  pravum  esse,  sed  ad  vitam  aeternam  electum  esse,  et  reprobum  esse  stare  simul  nullo  modo  possunt.  Hic  igitur  quum  reprobatus  dicitur  primogenitus  ille  Isai,  non  intelligitur  a  spe  salutis  aeternae  deiectus,  et  a  Deo  condemnatus:  neque  enim  ullius  sceleris  aut  rebellionis  damnatur,  sed  ab  illa  singulari  electione  in  regiam  dignitatem  repulsus  intelligitur,  quae  Davidi  Dei  voluntate  servabatur.  Ex  quibus  observandum,  Deum  promoventem  Davidem  adhuc  puerum  et  opilionem  ad  regiam  dignitatem,  caeteris  fratribus  reiectis,  nos  docere  fieri  ex  ipsius  gratuita  bonitate  quod  nos  gratos  et  acceptos  habeat:  et  nihil  deberi  merito  nostro  quod  huic  vel  illi  praeferamur,  quandoquidem  ab  ipsius  sola  bonitate  promanat.  Regni  quidem  hic  fit  mentio:  sed  quod  fuit  figura  spiritualis  illius  quod  Dominus  noster  Iesus  Christus  erat  suo  tempore  accepturus.  Et  quae  de  unctione  dicuntur,  ad  singula  ecclesiae  membra  pertinent.  Fuit  igitur  David  tanquam  viva  imago  Domini  nostri  Iesu  Christi.  Sed  an  insignis  aliqua  dignitas  et  virtus  eum  commendavit,  eiusque  electionem  promovit?  Minime  gentium.  Nam,  ut  vidimus,  abiectus  erat  David  et  contemptus  inter  fratres:  quorum  tamen  fit  caput  et  dominus.  Si  quis  excipiat  Davidem  coram  Deo  cor  integrum  habuisse,  et  quidem  ipsius  Domini  sententia  :  quaero  vicissim  :  A  quo  acceperit  cor  illud  purum?  Neque  enim  a  se  ipso  habuit:  neque  aliqua  virtute  fuit  prae  fratribus  insignis.  Quod  si  quis  eum  liberi  arbitrii  viribus  acquisivisse  dicat,  sane  fateatur  oportet  ex  corrupto  et  maledicto  Adami  semine  progenitum  :  ac  proinde  non  potuisse  sibi  rectum  affectum  dare,  quo  ad  Deum  accederet,  sed  a  Deo  ipsi  datum  et  in  ipso  formatum.  Quare  vero  Deus  non  fecit  eum  primum  nasci?  quare  primogenitum  liberorum  Isai  non  ornavit  iis  spiritus  donis  quibus  tantam  dignitatem  promereretur?  Nempe  hac  ratione  omnem  superbiam  et  arrogantiam  Deus  vult  deiicere  et  prosternere,  ut  Deo  quosdam  ad  summos  honores  evehente,  gloriam  omnem  soli  illi  tribuere  discamus.  Quare,  obsecro,  Deus  Iacobum  potius  quam  Esavum  elegit?  Nonne  poterat  efficere  ut  Iacobus  esset  primogenitus,  et  ita  naturae  ordo  et  dignitas  servaretur?  Verum  etsi  fratris  talum  prehenderet,  primogenitura  repulsus  est:  quam  deinde  contra  naturam  et  admirabili  ratione  recuperavit.  Quare,  inquam,  ista  sic  contigerunt?  Nempe  ut  de  donis  quae  Dei  manu  accipimus  loquentes  discamus  supra  mundum  ipsum  efferri,  et  ad  ipsum  unum  bonorum  omnium  fontem  assurgere.  Eadem  ratio  est  filiorum  Iosephi:  quorum  primogenitus  minori  postponitur:  Nonne  enim  Deus  poterat  efficere,  ut  primus  nasceretur  quem  alteri  praeponere  volebat.  Sed  voluit  ordine  naturae  inferiorem  esse,  quem  tamen  nihilominus  in