29:168  en  haut,  afin  de  faire  hommage  a  Dieu,  en  tous  les  benefices  que  nous  recevons  de  sa  main.  Or  nous  avons  aussi  en  cela  a  noter  ce  qui  est  couche  par  Moyse.  Il  dit  que  tout  le  bien  qu'aura  Ioseph  avec  tout  son  lignage  viendra  de  la  faveur  gratuite  de  celuy  qui  a  habite  au  buisson.  Or  il  n'y  a  nulle  doute  qu'il  n'entende  Dieu.  Et  pourquoy  est-ce  qu'il  le  met  ici  au  buisson?  Car  il  semble  de  prime  face  que  ce  soit  une  chose  absurde,  ou  qui  ne  serve  qu'a  induire  les  ignorans  ou  les  infirmes  a  superstition.  Nous  savons  que  l'Escriture  saincte  en  parlant  de  Dieu,  dit  qu'il  habite  au  ciel,  non  pas  que  sa  maieste  soit  la  enclose:  car  son  essence  est  infinie,  elle  comprend  toutes  creatures,  comme  il  est  dit  en  d'autres  passages.  Mais  ce  mot  de  Ciel  est  pour  nous  retirer  de  ce  monde,  quand  nous  pensons  de  Dieu:  quand  nous  le  devons  adorer,  que  nous  n'imaginions  rien  de  luy  terrestre,  mais  que  nous  cognoissions  qu'il  surmonte  ,tout,  et  qu'il  nous  faut  sentir  de  luy  ce  que  nous  ne  comprenons  pas.  Or  puis  que  ainsi  est  que  l'Escriture  met  le  tabernacle  de  Dieu  au  ciel,  afin  que  nous  soyons  eslevez  par  dessus  tout  le  monde,  et  sur  toutes  creatures,  quand  nous  pensons  a  luy:  pourquoy  est-ce  qu'en  ce  passage  Moyse  le  met  en  un  buisson?  Or  c'est  a  cause  que  Dieu  s'estoit  la  revele  a  luy.  Et  nous  faut  bien  noter  qu'il  y  a  deux  facons  de  parler  diverses  en  l'Escriture  saincte,  quand  Dieu  nous  appelle  a  soy:  mais  ceste  diversite  n'est  pas  pour  nous  distraire  en  des  opinions  contraires,  elles  se  rapportent  tout  a  un.  Et  comment  cela?  Dieu  aucunes  fois  nous  monstre  quelle  est  sa  gloire,  afin  que  nous  ayons  cest  article  tout  resolu,  qu'il  est  incomprehensible,  et  qu'il  nous  le  faut  adorer  en  toute  humilite,  qu'il  ne  faut  point  que  nous  attendons  de  le  forger  a  nostre  teste,  et  de  le  faire  semblable  a  nous,  ou  selon  nos  fantasies,  et  le  transfiguret  Quand  donc  l'Escriture  saincte  nous  propose  la  maieste  de  Dieu  si  haute  que  nous  y  sommes  confus,  et  mesmes  les  Anges  de  paradis:  comme  il  est  dit,  que  les  Cherubins  cachent  leur  visage,  qu'ils  ne  peuvent  contempler  la  maieste  si  grande  et  si  infinie  qu'elle  est  en  Dieu:  qu'en  cela  il  nous  est  monstre  que  nous  devons  nous  humilier  sous  une  telle  grandeur  et  hautesse.  Or  cependant  Dieu  regarde  qu'il  nous  est  utile  d'avoir  quelque  privaute  a  luy,  et  alors  il  condescend  a  nostre  rudesse,  et  prend  comme  une  facon  nouvelle:  non  pas  (comme  i'ay  dit)  qui  soit  contraire,  mais  c'est  afin  que  nous  ne  soyons  point  effarouchez,  et  que  nous  ne  prenions  point  occasion  de  nous  retirer  de  luy.  Il  nous  convie  donc  doucement,  et  alors  il  s'abbaisse,  et  se  fait  comme  petit  envers  nous.  Et  voila  a  quoy  se  sont  rapportez  de  tout  temps  les  Sacremens.  Comme  encores  auiourd'huy  au  Baptesme,  nous  voyons  la  de  l'eau:  en  la  Cene,  nous  voyons  du