27:168  sont  propres:  comme  quand  nous  faisons  ceste  ceremonie  en  priant,  de  nous  agenouiller,  d'oster  le  bonnet,  que  nous  eslevons  les  mains  en  haut.  Pourquoy  faisons-nous  cela?  Ce  n'est  pas  que  Dieu  en  ait  affaire  de  son  coste:  mais  c'est  pour  nostre  foiblesse:  pource  que  nous  sommes  grossiers,  il  faut  que  nous  soyons  exercez  en  telle  sorte.  Comme  nous  avons  le  Baptesme,  nous  avons  la  saincte  Cene,  toutes  ces  ehoses-la  sont  par  l'infirmite  de  nostre  nature.  Voila  donc  ce  qu'il  nous  faut  noter  d'une  part.  Mais  cependant  gardons-nous  aussi  quand  Dieu  nous  aura  ainsi  supportez,  de  le  forger  semblable  a  nous,  et  de  cuider  qu'il  se  gouverne  a  nostre  appetit.  Car  il  y  a  danger  que  les  hommes  ne  tombent  tousiours  en  ceste  extremite.  Voila  donc  en  somme  ce  que  veut  dire  Moyse  :  Le  Seigneur  choisira  un  lieu  pour  y  mettre  son  sanctuaire,  il  veut  la  estre  adore  de  vous,  il  veut  que  la  on  luy  sacrifie,  et  que  la  vous  apportiez  vos  oblations,  que  vous  luy  faciez  hommage  de  vos  personnes,  et  de  vos  biens,  protestans  que  vous  estes  du  tout  a  luy:  mais  cependant  ne  pensez  point  que  vostre  Dieu  descende  du  ciel,  qu'il  soit  enclos  en  un  coffre,  et  en  une  arche:  ne  pensez  point  qu'il  soit  assis  entre  les  cherubins  a  la  facon  des  hommes  :  mais  c'est  assez  que  son  Nom  soit  la,  c'est  a  dire,  qu'il  vous  donne  quelque  signe  de  sa  presence,  et  de  sa  vertu,  afin  que  vous  soyez  certifiez  qu'il  exaucera  la  toutes  vos  oraisons,  et  qu'il  vous  sera  propice.  Mais  cependant  il  remplit  le  ciel  et  la  terre  quoy  qu'il  en  soit.  Ne  venez  point  donc  enclorre  la  maieste  et  essence  infinie  de  vostre  Dieu  en  un  anglet,  ou  en  un  temple  materiel,  et  corruptible.  Gardez-vous  d'une  telle  superstition,  contentez-vous  d'avoir  son  nom,  c'est  a  dire,  que  vostre  Dieu  soit  la  reclame,  et  que  sa  Loy  vous  soit  preschee,  que  ses  promesses  vous  soyent  mises  en  avant,  que  vous  soyez  fondez  sur  sa  grace,  que  vous  ne  doutiez  point  qu'il  ne  soit  vostre  pere  et  sauveur,  que  vous  le  requeriez  hardiment,  estans  asseurez  qu'il  est  prest  de  recevoir  vos  requestes.  Voila  a  quel  propos  vostre  Dieu  veut  estre  ainsi  avec  vous.  Or  de  ce  passage  nous  avons  a  recueillir  une  bonne  doctrine:  c'est,  d'autant  que  Dieu  nous  ordonne  les  moyens  qui  sont  propres  a  nostre  infirmite,  pour  le  servir,  que  nous  en  usions  :  comme  il  est  dit  :  Tu  cercheras  ce  lieu-la.  Car  Moyse  commande  que  les  Iuifs  estans  advertis  de  leur  rudesse,  profitent  selon  que  nostre  Seigneur  les  enseigne,  c'est  assavoir  par  les  ceremonies  qu'il  leur  donnera.  Auiourd'huy  nous  ne  les  aurons  point  semblables  a  celles  de  la  Loy:  mais  si  est-ce  que  nostre  Seigneur  encores  nous  supporte,  comme  il  voit  qu'il  en  est  besoin,  et  nous  donne  telles  ceremonies  qui  nous  sont  convenables  (comme  i'ay  desia  dit)  que  nous  avons  les  assemblees  qui  se  font.