21:168  proderet,  saepe  Davidis  illud  ingeminans  in  doloribus  (Ps.  39,  v.  10),  Tacui,  Domine,  quia  fecisti,  et  interdum  illud  Iesaiae  (Ies.  38,  v.  14),  Gemebam  sicut  columba.  Audivi  quoque  quum  diceret:  Tu  me  conteris,  Domine,  sed  abunde  mihi  sufficit  quod  tua  haec  sit  manus.  Patere  diem  et  noctem  ipsius  fores  oportuisset,  si  admissi  fuissent  quotcunque  officii  causa  illum  adire  cupiebant  :  quos  quum  voce,  ut  diximus,  praepedita  compellare  se  non  posse  videret,  petierat  ut  unusquisque  potius  pro  ipso  precaretur,  quam  de  eo  invisendo  laboraret.  Saepe  quoque  mihi,  cuius  conspectum  alioqui  nunquam  iniucundum  ei  fuisse  sum  expertus,  significavit,  sibi  religionem  esse  vel  tantillum  occupationes  meas  remorari:  adeo  fuit  ille  temporis  parcus,  quod  ecclesiae  impendi  sciret,  et  in  eo  plus  etiam  aequo  religiosus,  ne  amicos  vel  tantillum  gravaret.  Ita  igitur  se  ipsum  et  amicos  consolans  vixit  usque  ad  XIX.  Maii,  quo  die  censuram  inter  nos  ministros  exercere  et  una  cibum  capere  amicitiae  testandae  causa  consuevimus,  biduo  post  videlicet  Pentecoste  et  coena  Domini  sequuturis.  Eo  die  igitur  quum  nobis  concessisset,  ut  apud  ipsum  coena  communis  instrueretur,  et  e  lectulo  collectis  utcunque  viribus  in  proximum  conclave  esset  delatus:  Postremum,  inquit,  ad  vos  accedo,  fratres,  nunquam  posthac  ad  mensam  adcubiturus,  quod  nobis  tristissimae  coenae  initium  fuit.  Concepit  tamen  preces  et  paululum  cibi  sumpsit  sermone  quantum  licuit  inter  coenandum  ad  hilaritatem  composito.  Inde  coena  nondum  plane  exacta,  quum  in  contiguum  cubiculum  reportari  se  iussisset,  renidenti  plane  vulto  coetum  compellans:  Paries  hic,  inquit,  interiectus  non  impediet  quo  minus  corpore  absens  vestro  tamen  coetui  spiritu  intersim.  Contigit  quod  praedixerat:  siquidem  ab  eo  die  supinus  semper  iacuit,  corpusculo  (si  vultum  parum  admodum  immu*  tatum  excipias)  ita  emaciato  ut  solus  illi  spiritus  superesset.  Die  quo  decessit,  nempe  XXVII.  Maii,  visus  est  fortius  et  minore  difficultate  loqui.  Sed  hic  erat  extremus  naturae  conatus.  Nam  vesperi  circiter  octavam  repente  praesentis  mortis  certa  signa  apparuerunt:  quod  quum  mihi  paulo  ante  ab  ipso  digresso  et  cuidam  alii  ex  fratribus  esset  a  domesticis  significatum,  protinus  accurrens  illum  reperi  usque  adeo  tranquille  mortuum,  nulloque  pedum  vel  manuum  concussu,  ut  neque  graviorem  spiritum  antea  duxerit,  neque  sensu  et  iudicio,  imo  ne  voce  quidem  penitus  ad  extremum  usque  halitum  fuerit  destitutus,  et  dormienti  quam  mortuo  multo  similior  videretur.  Sic  igitur  eo  die  cum  occidente  sole  splendida  etiam  haec  lux  nobis  erepta  est.  Sequente  nocte  ac  postero  die  in  urbe  tota  ingens  fuit  comploratio.  Requirebat  enim  universa  civitas  [D  4]