21:167  167  THEODORI  BEZAE  168  in  hoc  opere,  nec  animo  frangimini:  Dominus  enim  hanc  rempublicam  et  ecclesiam  adversus  hostium  minas  servabit.  Absint  a  vobis  dissidia,  mutuaque  caritate  vos  complectimini.  Cogitate  etiam  atque  etiam  quid  huic  ecclesiae  debeatis,  in  qua  vos  Dominus  collocavit,  neque  vos  quidquam  hinc  abducat.  Sin  minus,  facile  quidem  fuerit  nonnullis  eius  pertaesis  quasi  per  cuniculos  evadere:  sed  experientur  illi  Dominum  decipi  non  posse.  Quum  primum  in  hanc  urbem  venirem,  annunciabatur  quidem  evangelium,  sed  perturbatissimae  res  erant,  quasi  nihil  aliud  esset  christianismus  quam  statuarum  eversio,  nec  pauci  erant  scelerati  a  quibus  indignissima  multa  sum  perpessus.  Sed  Dominus  ille  Deus  noster  me,  me  inquam,  natura  (dico  quod  res  est)  minime  audentem  ita  confirmavit,  ut  nullis  illorum  conatibus  cesserim.  Argentina  postea  huc  redii,  vocationem  hanc  invito  animo  sequutus,  quod  infructuosa  mihi  fore  videretur.  Ignorabam  enim  quid  statuisset  Dominus,  et  res  erat  plurimarum  maximarumque  difficultatum  plena.  Sed  pergens  in  hoc  opere  sensi  tandem  re  ipsa  Dominum  labori  meo  benedixisse.  Perstate  igitur  et  vos  in  hac  vocatione,  institutum  ordinem  retinete,  date  simul  operam,  ut  populus  in  obsequio  doctrinae  contineatur.  Sunt  enim  nonnulli  improbi  et  contumaces.  Reis,  ut  videtis,  non  male  sunt  constitutae  :  quo  magis  coram  Deo  nocentes  eritis  si  vestra  ignavia  labefactentur.  Testor  vero  me  vobiscum,  fratres,  vera  sinceraque  caritate  coniunctissimum  vixisse  et  nunc  a  vobis  discedere.  Quod  si  quando  me  in  hoc  morbo  morosiorem  estis  experti,  veniam  a  vobis  peto,  et  ingentes  vobis  gratias  ago,  quod  aegrotante  me  onus  mihi  impositum  sustinueritis.  Haec  loquutus  dextram  singulis  porrexit.  Nos  moestissimis  animis  ac  minime  siccis  oculis  ab  eo  tum  discessimus.  II.  Maii  quum  ex  Farelli  literis  cognovisset  (Viretus  enim  longius  aberat),  statuisse  illum  iam  octuagenarium  et  valetudinarium  senem  iter  ad  se  ingredi,  sic  ei  latine  rescripsit:  Vale,  mi  optime  et  integerrime  frater,  et  quando  te  Deus  superstitem  manere  vult  in  mundo,  vive  memor  nostrae  coniunctionis,  quae  ut  ecclesiae  Dei  fuit  utilis,  ita  nos  eius  fructus  in  coelo  manet.  Nolo  te  fatiges  mea  causa.  Aegre  spiritum  traho  et  assidue  exspecto,  dum  me  anhelitus  deficiat.  Satis  est  quod  Christo  vivo  et  morior,  qui  suis  lucrum  est  in  vita  et  morte.  Iterum  vale  cum  fratribus.  Genevae  II.  Maii  MDLXIV.  Venit  tamen  Genevam  bonus  ille  senex,  et  quum  una  inter  se  loquuti  essent  postridie  Neocomum  rediit.  Reliquos  ad  obitum  usque  dies  in  perpetuis  paene  precibus  consumpsit,  voce  quidem  propter  asthma  suspiriosa,  sed  oculis  quales  ad  extremum  usque  clare  micantes  habuit  in  coelum  sublatis,  et  ita  composito  vultu,  ut  sese  precantis  ardor  totum