51:166  guntur  papistae,  Paulum  hic  totam  salutis  nostrae  gloriam  Dei  gratiae  tribuere.  Sed  aliud  commentum  excogitant,  hoc  ideo  dici,  quia  Deus  primam  gratiam  conferat.  Atqui  nimis  sunt  inepti  qui  se  ita  expediri  putant,  quum  Paulus  hominem  cum  suis  facultatibus  excludat,  non  tantum  a  principio  consequendae  salutis,  sed  in  totum  ab  ipsa  salute.  Bis  autem  stulti  sunt,  quod  non  animadvertunt  hanc  conclusionem,  ne  quis  glorietur.  Locus  enim  semper  manet  humanae  gloriae,  quamdiu  extra  gratiam  aliquid  valent  merita.  Non  stat  igitur  Pauli  sententia,  nisi  solida  laus  uni  Deo  et  eius  misericordiae  deferatur.  Caeterum  hunc  locum  male  vulgo  exponunt  :  quia  doni  vocabulum  restringunt  ad  fidem  solam.  Nam  Paulus  superiorem  sententiam  aliis  verbis  repetit.  Non  intelligit  ergo  fidem  esse  donum  Dei,  sed  salutem  donari  nobis  a  Deo,  aut  Dei  dono  obtingere.  10.  Ipsius  enim  opus.  A  privatione  contrarii  probat  quod  dixit,  nos  gratia  salvatos  esse:  siquidem  nulla  suppetere  nobis  opera,  quibus  salutem  possimus  mereri.  Quidquid  enim  bonorum  operum  habemus,  id  esse  fructum  regenerationis.  Unde  sequitur,  opera  ipsa  esse  partem  gratiae.  Quod  dicit,  nos  esse  opus  Dei,  non  accipiendum  est  de  communi  creatione,  qua  fit  ut  homines  nascamur:  sed  novas  esse  creaturas  nos  asserit,  qui  spiritu  Christi  formati  simus  ad  iustitiam,  non  propria  virtute.  Hoc  in  solos  fideles  competit,  qui,  quum  ex  Adam  nati  essent  vitiosi  et  perversi,  Christi  gratia  spiritualiter  regenerantur,  ut  incipiant  esse  novi  homines.  Ergo  quidquid  est  in  nobis  boni,  opus  est  Dei  supernaturale.  Et  expositio  sequitur  in  contextu:  nam  ideo  nos  esse  opus  Dei  adiungit,  quia  creati  simus  non  in  Adam,  sed  in  Christo:  neque  ad  quamlibet  vitam,  sed  ad  bona  opera.  Quid  iam  restat  libero  arbitrio,  si  quaecunque  a  nobis  proficiscuntur  bona  opera,  accepta  spiritui  Dei  feruntur?  Expendant  pii  lectores  verba  apostoli.  Non  dicit,  adiuvari  nos  a  Deo:  non  dicit,  praeparari  voluntatem,  ut  proprio  marte  deinde  currat:  non  dicit,  facultatem  nobis  conferri  bene  volendi,  ut  nostrum  sit  postea  utrumvis  eligere  :  quemadmodum  garrire  solent,  qui  extenuant  Dei  gratiam  quoad  possunt:  sed  docet  nos  esse  Dei  opus  :  et  quidquid  est  boni  in  nobis,  esse  eius  creationem.  Quo  significat,  formari  totum  hominem  eius  manu,  ut  bonus  sit.  Non  ergo  facultas  tantum  benevolendi,  aut  nescioquae  praeparatio,  aut  adminiculum,  sed  ipsa  recta  voluntas  eius  opus  est.  Alioqui  etiam  non  valeret  Pauli  argumentum.  Intendit  probare,  hominem  sibi  nequaquam  acquirere  salutem,  sed  gratis  a  Deo  consequi.  Probatio  est,  quod  homo  nihil  sit,  nisi  Dei  gratia.  Quisquis  ergo  seorsum  a  Dei  gratia  aliquid  vel  minimum  homini  arrogat,  tantundem  illi  concedit  potestatis  ad  salutem  acquirendam.  n*