21:166  potius  cum  animi  demissione  gratias  agite.  Sin  adversa  vobis  acciderint,  adeoque  vos  undique  mortes  circumsteterint,  sperate  tamen  in  eo  qui  mortuos  etiam  excitat.  Imo  tunc  maxime  cogitate  sic  vos  a  Deo  expergefieri  ut  in  eum  unum  respicere  magis  ac  magis  discatis.  Quod  si  firmam  hanc  rempublicam  conservari  cupitis,  videte  etiam  atque  etiam,  ne  solium  istud  sanctum  in  quo  vos  ille  collocavit,  sordibus  conspurcetur.  Hic  enim  unus  est  summus  Deus,  rex  regum,  et  dominorum  omnium  dominus,  eos  a  quibus  honorabitur  honoribus  actuturus  *  et  sui  vicissim  contemptores  abiecturus.  Hunc  igitur  ex  ipsius  praeceptis  colite,  et  hac  de  re  magis  ac  magis  cogitate.  Semper  enim  ab  eo  plurimum  absumus  quod  a  nobis  perfici  decuit.  Novi  ego  singulorum  ingenia  et  mores,  et  scio  vos  exhortatione  egere.  Nemo  est  ex  iis  etiam  qui  excellunt  cui  multa  non  desint.  Hic  unusquisque  se  ipsum  circumspiciat,  et  quae  sibi  deesse  intelligit  a  Domino  requirat.  Videmus  quot  vitia  in  plerisque  orbis  terrarum  conciliis  regnent.  Alii  frigent  publicoque  neglecto  rebus  suis  curandis  incumbunt,  alii  privatis  affectibus  indulgent,  alii  praeclaris  Dei  donis  non  utuntur  ut  par  erat,  alii  sese  ostentant  et  confidentia  quadam  [fol.  IIII.  2]  quidquid  censuerint  a  reliquis  probari  postulant.  Senes  commonefacio,  ne  iunioribus  invideant,  quos  a  Domino  compererint  aliquibus  donis  esse  exornatos.  Iuniores  moneo,  ut  procul  ab  omni  elatione  sese  modestos  praebeant.  Alius  alium  ne  interturbato.  Vitate  simultates  et  omnes  illas  animi  acerbitates,  quae  multos  in  gerenda  republica  a  recto  instituto  averterunt.  Haec  autem  vitabitis,  si  singuli  quidem  intra  suum  modulum  sese  continuerint,  omnes  vero  bona  fide  commissam  sibi  reipublicae  partem  administrent.  In  causarum  civilium  vero  iudiciis  ne  quis  sit,  obsecro,  favori  vel  inimicitiis  locus:  nemo  obliquis  artibus  ius  pervetito,  nemo  suis  commendationibus  quo  minus  leges  valeant  obsistito,  nemo  ab  aequo  et  bono  discedito.  Si  quem  affectus  sinister  titillaverit,  constanter  ei  resistito,  et  in  eum  respicito  a  quo  fuit  in  eo  solio  collocatus,  et  ab  eodem  sanctum  spiritum  postulato.  Quod  superest  iterum  precor  ut  meas  mihi  infirmitates  condonetis  quas  ego  coram  Deo  et  angelis  adeoque  coram  vobis,  venerandi  Domini,  profiteor  et  agnosco.  Haec  ubi  dixisset,  Deum  Optimum  Maximum  precatus,  ut  eos  suis  donis  magis  ac  magis  cumulatos  sancto  suo  spiritu  ad  totius  reipublicae  salutem  gubernaret,  praebita  singulis  dextra  moestos  omnes  illos,  nec  aliter  ab  eo  quam  a  communi  parente  cum  lacrymis  discedentes  dimisit.  Die  XXVIII  [D  3]  Aprilis  quum  omnes  ipsius  rogatu  Genevensis  ditionis  ministri  convenissemus:  At  vos,  inquit,  fratres,  post  obitum  meum  perstate  l  l  *