10.1:166  non  attingam.  In  explicanda  fidei  iustificatione  meris  praestigiis  se  ipsum  fascinavit,  et  alios  delusit.  Admittit  quidem  quod  negare  ausus  non  est,  remissionem  peccatorum  intercedere  in  homine  iustificando:  sed  in  primo  et  summo  gradu  locans  spectrum  essentialis  iustitiae,  quod  ipse  finxit,  nihil  aliud  relinquit  gratuitae  Dei  acceptationi,  quam  ut  sit  inferior  quaedam  appendix.  Essentialem  iustitiam  sibi  nulla  ratione  imaginatus  est.  Nam  etsi  eo  trahit  scripturae  testimonia,  quae  Deum  in  nobis  habitare  asserunt,  et  nos  unum  cum  ipso  fieri:  nihil  tamen  inde  probatur,  quam  arcana  spiritus  virtute,  dum  coalescimus  in  Christi  corpus,  uniri  simul  Deo.  Adde,  quod  essentialis  illa  communicatio  ex  Manichaeorum  deliriis  sumpta  est.  Nec  video  quomodo  excusari  possit  hoc  absurdum,  essentialem  Dei  iustitiam  esse  accidens,  quod  adesse  nunc  homini  possit,  nunc  abesse.  Quanquam  longa  refutatione  opus  non  est,  si  principium  illud  tenemus,  iustitiam  hominis  in  ipsa  creatione  fuisse  rectitudinem,  ad  quam  formatus  erat,  ut  in  singulis  animae  partibus,  adeoque  in  ipso  corpore  fulgeret  Dei  gloria.  Quum  ergo  luce  intelligentiae  praeditus  esset  homo,  et  voluntate  compositus  in  obsequium  Dei,  et  eadem  symmetria  esset  in  singulis  facultatibus,  dicimus  hominem  fuisse  iustum.  Hac  descriptione  non  contentus  Osiander,  Christum  fingit  non  modo  fuisse  Ideam,  sed  primarium  exemplar,  ut  Adam  essentialis  esset  eius  imago.  Hinc  commentum  hoc,  in  quo  ita  se  inebriavit,  ut  a  nullis  absurdis  sibi  caveret.  Nunc  postquam  alienatus  est  homo  a  Deo,  eum  dicimus  restitui  iustitia,  et  sanctificatione,  quarum  prior  gratuitam  reconciliationem  significat:  altera  renovationem  hominis.  Ergo  quod  ad  voces  spectat,  perperam  Osiander  regenerationem  confundit  cum  iustitia.  Fixum  enim  manet  illud  Pauli,  veram  iustitiae  definitionem  poni  a  Davide  his  verbis  :  Beatus  vir  cui  non  imputat  Deus  peccata  (Rom.  4,  6).  Dicit  Osiander,  iustificari  nos  non  tantum  obedientia  quam  Christus  praestitit,  et  satisfactione  qua  defunctus  est  pro  expiandis  peccatis,  sed  divina  aeternaque  eius  iustitia.  Longe  aliter  Paulus,  qui  simpliciter  affirmat,  iustificari  nos  obedientia  unius  hominis  (Rom.  5,  19),  et  alibi  aequaliter  pronunciat  datum  esse  nobis  Christum  in  redemptionem  et  iustitiam  (1.  Cor.  1,  30).  Item  factum  esse  sub  lege,  ut  nos  a  maledictione  legis  redimeret  (Gal.  4,  4).  Haec  porro  est  iustitia,  de  qua  ubique  disserit,  deleto  reatu,  recipi  nos  a  Deo  in  gratiam.  Et  certe  ad  humanam  Christi  naturam  refertur  illud:  Propter  eos  sanctifico  me  ipsum  (Ioann.  17,  19).  Ad  haec  si  caro  Christi  vere  est  cibus,  et  sanguis  eius  vere  est  potus,  colligimus  non  aliter  iustificari  nos  in  ipso,  nisi  quatenus  est  propitiator.  De  reconciliatione,  quam  inscite  ac  perverse  loquatur  Osiander,  satis  superque  patet  ex  uno  Pauli  loco  (2.  Cor.  ll*