1:166  [CO  1.  166]  impietatis  non  conspiciunt,  operae  pretium  est  indicare  non  solum  quales  sint  indulgentiae,  sed  quid  omnino  sint,  omni  macula  abstersae?  Sunt  autem  ut  genuine  describam,  sanguinis  Christi  profanatio  satanaeque  ludibrium,  quo  christianum  populum  a  Dei  gratia,  a  vita  quae  est  in  Christo,  abducat,  et  a  vera  salutis  via  avertat.  Qui  enim  poterat  foedius  profanari  Christi  sanguis,  quam  dum  negatur  sufficere  ad  peccatorum  remissionem,  ad  reconciliationem,  ad  satisfactionem,  nisi  velut  arescentis  et  exhausti  defectus  aliunde  suppleatur  et  sufficiatur? [p. 339]  Christo  lex  et  prophetiae  omnes,  inquit  Petrus,  testimonium  perhibent,  quod  per  ipsum  accipienda  sit  remissio  peccatorum  (Act.  10).  Indulgentiae  remissionem  peccatorum  per  Petrum,  Paulum  et  martyres  largiuntur.  Sanguis  Christi  emundat  nos  a  peccato,  inquit  Ioannes  (1  Ioan.  1).  Indulgentiae,  sanguinem  martyrum  faciunt  peccati  ablutionem.  Christus,  inquit  Paulus  (2  Cor.  5),  qui  peccatum  non  noverat,  factus  est  pro  nobis  peccatum  (id  est,  peccati  satisfactio)  ut  iustitia  Dei  efficeremur  in  illo.  Indulgentiae  peccatorum  satisfactionem  in  sanguine  martyrum  reponunt.  Clamabat  Paulus  (1  Cor.  1)  et  Corinthiis  testificabatur:  solum  Christum  pro  ipsis  crucifixum  et  mortuum  esse.  Indulgentiae  pronunciant,  Paulum  et  alios  pro  nobis  mortuos.  Alibi  dicit  (Act.  20):  Christum  acquisivisse  ecclesiam  suo  sanguine.  Indulgentiae  aliud  pretium  acquisitionis  in  martyrum  sanguine  statuunt.  Una  oblatione  Christus  consummavit  in  perpetuum  sanctificatos,  ait  apostolus  (Hebr.  10).  Indulgentiae  reclamant,  a  martyribus  perfici  sanctificationem,  quae  alioqui  non  sufficiebat.  Ioannes  dicit  (Apoc.  7):  sanctos  omnes  lavisse  stolas  suas  in  sanguine  agni.  Indulgentiae  docent,  lavare  stolas  in  sanguine  sanctorum.  Equidem,  cum  tota  eorum  doctrina  ex  horrendis  sacrilegiis  et  blasphemiis  consuta  sit,  haec  tamen [p. 340]  prae  aliis  prodigiosa  est  blasphemia.  Agnoscant,  annon  haec  sint  sua  placita.  Martyres  plus  [OS  191]  morte  sua  Deo  praestitisse  ac  meritos  esse,  quam  sibi  opus  esset,  tantamque  illis  meritorum  largitatem  superfuisse,  quae  in  alios  redundaret;  ne  igitur  supervacuum  sit  tantum  bonum,  commisceri  eorum  sanguinem  sanguini  Christi  et  ex  utroque  thesaurum  ecclesiae  confici,  ad  remissionem  et  satisfactionem  peccatorum;  atque  ita  accipiendum,  quod  ait  Paulus  (Col.  1):  suppleo  in  corpore  meo,  ea  quae  desunt  passionum  Christi,  pro  corpore  eius,  quod  est  ecclesia.  Quid  hoc  est,  nisi  Christo  nomen  relinquere,  caeterum  vulgarem  sanctulum  facere,  qui  in  turba  vix  dignoscatur?  Unum,  unum  illum  praedicari  decebat,  unum  proponi,  unum  nominari,  unum  respici,  cum  de  obtinenda  peccatorum  remissione,  expiatione,  satisfactione  agitur.  Sed  audiamus  eorum  enthymemata.  Ne  sine  fructu  ll*