42:164  n'y  auroit  que  ce  que  dit  sainct  Pierre,  nous  voions  l'iniure  et  l'outrage  qu'ils  font  a  Dieu,  et  l'ingratitude  par  trop  vilaine,  car  sainct  Pierre  nous  dit,  que  les  prophetes  ont  servi  a  nous  plus  qu'a  eux,  que  ce  que  Dieu  leur  ha  revele  ha  este  pour  nostre  temps  plustost  que  pour  ceux  qui  les  ont  oy  parler:  voila  les  prophetes  qui  ont  eu  leurs  auditeurs  et  disciples,  ceux  la  n'ont  pas  tant  profite  en  leur  doctrine,  comme  nous  devons  auiourd'huy  faire.  Et  pourquoy?  C'est  pour  ce  que  Dieu  nous  l'ha  destinee  a  nostre  usage,  et  pour  cette  cause  sainct  Paul  dit  que  nous  sommes  parvenus  a  la  fin  des  temps,  c'est  a  dire,  que  si  on  compare  le  temps  auquel  nous  sommes,  que  c'est  comme  le  but,  comme  le  blanc  auquel  Dieu  ha  tendu,  quand  il  ha  envoie  anciennement  ses  prophetes.  Ainsi  donc  en  ce  passage  quand  il  est  dit  que  ces  choses  seront  cachees  et  cachetees,  iusques  au  temps  defini,  par  cela  notons  que  Dieu  ha  voulu  signifier  a  Daniel,  que  si  cette  prophetie  n'estoit  profitable  de  son  temps,  pour  la  confirmation  des  fideles,  et  pour  les  instruire,  a  fin  d'estre  confermes  en  foy  et  esperance,  qu'il  y  en  auroit  une  plus  grande  utilite,  qu'il  s'en  feroit  une  estendue  plus  grande  au  temps  a  venir,  comme  de  fait  nous  le  voions  tous  les  iours  a  nostre  profit,  et  edification  de  nostre  foy,  et  c'est  ce  que  desia  nous  avons  veu,  quand  il  estoit  dit  au  prophete,  Cachete  cette  prophetie,  l'ange  adioustoit  quant  et  quant,  Plusieurs  courront,  et  la  doctrine  sera  augmentee.  Et  ainsi  donc  quand  Dieu  ha  revele  ces  choses  ici,  il  ha  bien  voulu  que  cette  doctrine  profitast  au  temps  de  Daniel,  commencant  par  luy  qui  en  estoit  le  prophete,  il  ha  falu  (di-ie)  que  les  fideles  applicassent  cela  a  leur  usage  et  instruction,  mais  si  est-ce  que  Dieu  ha  voulu  que  ces  choses  la,  qui  estoient  pour  lors  comme  lettres  closes,  fussent  auiourd'huy  comme  lettres  patentes,  qu'auiourd'huy  cette  doctrine  soit  publiee  avec  plus  grande  ardeur  que  de  ce  temps  la.  Comment  donc  nous  pourrons-nous  excuser,  si  nous  ne  tenons  compte  de  ce  que  Dieu  nous  donne  auiourd'huy,  quand  les  prophetes,  les  saincts  patriarches  et  les  peres  qui  ont  vescu  sous  la  loy  n'ont  eu  qu'un  petit  goust  de  ce  que  nous  avons  maintenant  comme  a  pleine  bouche?  ils  n'ont  eu  qu'une  petite  estincelle,  ou  Dieu  nous  esclaire  auiourd'huy  comme  en  plein  iour,  que  faut-il  donc  que  nous  facions  sinon  que  nous  soions  tant  plus  attentifs  a  profiter  en  cette  escole  de  nostre  Dieu?  Voila  quant  a  ce  passage  ou  il  est  dit  que  les  choses  seront  cachees  et  cachetees  pour  un  temps,  voire  iusques  au  temps  defini,  c'est  a  dire,  que  l'opportunite  sera  venue:  car  nostre  Seigneur  ha  les  saisons  en  sa  main,  et  voila  pourquoy  sainct  Paul  parlant  de  la  venue  de  nostre  Seigneur  Iesus  Christ,  l'appele  le  temps  de  plenitude,  c'est  a  dire,  le  temps  que  Dieu  avoit  ordonne.