27:164  ne  faut  pas  que  nous  appetions  de  faire  le  semblable  a  Dieu,  ne  regardons  point  a  cela:  mais  escoutons  ce  qu'il  nous  dit,  et  ce  qu'il  nous  commande.  Si  ce  mot  de  Moyse  estoit  entendu,  toutes  ces  diableries  qui  ont  regne,  et  regnent  encores  auiourd'huy  en  la  papaute,  s'en  iroyent  au  profond  d'enfer.  Car  nous  voyons  ici  une  condamnation  generale,  par  laquelle  Dieu  declaire  qu'il  desadvoue  tout  cela.  Et  pourquoy?  Car  il  no  veut  point  qu'on  luy  face  comme  les  ignorans  font  a  leurs  idoles.  Cela  sera  trouve  beau  quant  au  monde,  et  y  applaudit-on:  mais  voici  Dieu  qui  dit:  Ie  ne  vueil  point  estre  servi  a  telle  facon,  et  a  telle  guise,  que  les  hommes  ne  me  viennent  point  ici  forger  ce  que  bon  leur  semble.  Et  si  on  allegue:  Voire,  mais  telle  chose  sera-elle  mauvaise,  quand  ie  la  veux  faire  en  l'honneur  de  Dieu?  Sera-il  dit  que  ie  serve  aux  idoles,  quand  il  feray  telle  chose  a  bonne  intention,  et  le  tout  pour  servir  a  Dieu?  Y  a-il  si  grand  mal  qu'on  crie?  Non,  non:  il  faut  qu'on  escoutte  ce  que  Dieu  commande,  et  qu'on  s'arreste  la  du  tout,  et  qu'on  ne  presume  point  d'y  rien  adiouster.  Nous  voyons  donc  maintenant  ce  qu'emporte  ce  passage:  c'est  qu'il  nous  faut  oublier  toutes  nos  folies,  desquelles  nous  avons  este  abusez,  et  qu'il  ne  faut  point  alleguer:  I'ay  fait  ceci,  la  coustume  est  telle:  mais  comme  petits  enfans  que  nous  recevions  la  doctrine  contenue  en  l'Escriture  saincte.  Un  petit  enfant  ne  dira  point:  O  i'ay  ainsi  apprins  :  car  il  ne  sait  encores  rien,  il  recoit  ce  qu'on  luy  dit,  et  est  plus  docile,  pource  qu'il  n'est  point  preoccupe  de  quelque  mauvaise  facon  d'enseigner.  Mais  si  quelcun  a  este  en  mauvaise  eschole,  et  qu'il  soit  endurci  en  des  sottises,  que  si  on  le  veut  changer:  O!  i'ay  este  ainsi  apprins  (dira-il)  on  ne  luy  sauroit  faire  prononcer  droitement  une  syllabe,  ne  faire  dire  une  chose  a  propos.  Et  pourquoy?  Pource  qu'il  a  este  sous  un  asne  qui  l'a  forme  a  sa  guise,  et  qu'il  a  prins  ainsi  son  pli.  Ainsi  en  est-il  de  beaucoup  de  gens  qui  ont  este  nourris  en  ceste  maudite  papaute,  tousiours  ils  retiendront  quelque  reliqua,  pour  dire  :  Et  voire  mais  telle  chose  sera-elle  mauvaise?  Il  y  aura  tousiours  des  repliques  contre  Dieu.  Or  de  nostre  coste  prattiquons  ce  qui  est  dit  au  Pse.  45:  Escoute  fille,  oublie  ton  peuple  et  la  maison  de  ton  pere:  et  ton  mari  prendra  plaisir  en  toy.  La  sous  la  personne  de  Salomon  nous  savons  que  le  mariage  spirituel  de  Iesus  Christ  avec  nous  est  descrit.  Or  en  premier  lieu  il  nous  est  commande  d'oublier  tout  ce  qui  est  du  nostre:  car  par  la  maison  de  nostre  pere,  et  nostre  peuple,  il  est  signifie  tout  ce  que  nous  avons  de  nature,  que  tout  ce  que  nous  aurons  aime  auparavant,  toutes  les  delices  et  voluptez  desquelles  nous  avons  este  retenus,  il  faut  que  tout  cela  soit  mis  sous  le  pied:  ou  autrement  iamais  nous  ne  serons  agreables  au