10.1:164  spiritu  gustari  potest  eius  bonitas.  Si  quis  obiiciat,  nihil  igitur  amplius  restare  fidelibus,  unde  certo  adoptionem  suam  aestiment:  respondeo,  quamvis  magna  sit  similitudo  et  affinitas  inter  Dei  electos,  et  qui  fide  caduca  ad  tempus  donantur,  vigere  tamen  in  solis  electis  fiduciam  illam,  quam  celebrat  Paulus,  ut  pleno  ore  clament:  Abba  Pater  (Rom.  8,  15;  Gal.  4,  6).  Ergo  ut  solos  electos  semine  incorruptibili  Deus  in  perpetuum  regenerat,  ut  nunquam  dispereat  semen  vitae  eorum  cordibus  insitum:  ita  solide  in  illis  obsignat  adoptionis  suae  gratiam,  ut  stabilis  et  rata  sit.  Sed  hoc  minime  obstat,  quin  illa  inferior  spiritus  operatio  cursum  suum  habeat  etiam  in  reprobis.  Interea  docentur  fideles  sollicite  et  humiliter  se  ipsos  excutere,  ne  pro  fidei  certitudine  obrepat  carnis  securitas.  Adde  quod  reprobi  nunquam  sensum  gratiae  nisi  confuse  percipiunt,  ut  umbram  potius  apprehendant  quam  solidum  corpus:  quia  peccatorum  remissionem  spiritus  proprie  in  solis  electis  obsignat,  ut  eam  speciali  fide  in  usum  suum  applicent.  Merito  tamen  dicuntur  reprobi  Deum  credere  sibi  propitium,  quia  donum  reconciliationis,  licet  confuse  nec  satis  distincte,  suscipiunt:  non  quod  vel  eiusdem  fidei,  vel  regenerationis  participes  sint  cum  filiis  Dei,  sed  quia  commune  cum  illis  principium  habent.  Nec  vero  nego  quin  huc  usque  eorum  mentes  irradiet  Deus,  ut  eius  gratiam  agnoscant:  sed  sensum  illum  a  peculiari  testimonio,  quod  reddit  suis  electis,  ita  distinguit,  ut  ad  solidum  effectum  et  fruitionem  non  perveniant.  Non  enim  ideo  se  propitium  illis  demonstrat,  quia  vere  ex  morte  ereptos  in  custodiam  suam  recipiat:  sed  tantum  illis  demonstrat  praesentem  misericordiam.  Viva  autem  fidei  radice  solos  electos  dignatur,  ut  in  finem  usque  perseverent  Ita  diluitur  obiectio  illa:  Si  vere  gratiam  suam  demonstrat  Deus,  hoc  perpetuo  fixum  esse:  quia  nihil  obstat  quo  minus  praesenti  gratiae  suae  sensu,  qui  postea  evanescat,  Deus  aliquos  illustret.  Responsio  ad  tertiam  quaestionem.  Quanquam  fides  divinae  erga  nos  voluntatis  notitia  est,  et  certa  de  eius  veritate  persuasio,  non  mirum  tamen  est  divini  amoris  sensum  in  temporariis  evanescere,  qui  licet  fidei  sit  affinis,  ab  ea  tamen  multum  differt.  Voluntas  Dei  immutabilis  est,  fateor,  et  semper  eius  veritas  sibi  constat.  Atqui  nego  huc  usque  progredi  reprobos,  ut  in  arcanam  illam  revelationem  penetrent,  quam  solis  electis  scriptura  vendicat.  Nego  igitur  eos  vel  Dei  voluntatem,  ut  est  immutabilis,  capere;  vel  eius  veritatem  constanter  amplecti:  quia  in  sensu  evanido  subsidunt:  sicuti  arbor  non  satis  alte  plantata,  ut  vivas  radices  agat,  temporis  successu  arescit,  licet  per  aliquot  annos  non  flores  tantum  et  folia  emittat,