1:164  [CO  1.  164]  posse,  nisi  praeeunte  docenteque  spiritu  sancto  et  dictante  quid  agendum  sit.  Spiritum  sanctum  habere  se  illi  nugantur,  sed  re  ipsa  negant;  nisi  forte  spiritum  sanctum  rem  esse  vanam  et  nihili  fingunt,  ut  certe  fingunt;  sed  illis  non  credetur.  Atque  hac  quidem  machina  in  universum  subvertuntur,  ut,  cuiuscunque  ostii  clavem  se  habere  iactent,  semper  interrogandi  sint,  habeantne  spiritum  sanctum,  qui  clavium  est  arbiter  ac  moderator?  Si  habere  se  respondeant,  rursum  interpellandi  sunt,  an  errare  possit  spiritus  sanctus?  Istud  diserte  profari  non  audebunt,  tametsi  oblique  sua  doctrina  insinuant.  Inferendum  ergo  erit:  nullos  sacrificulos  habere  clavium  potestatem,  qui  passim  sine  delectu  solvunt  quae  ligari  Dominus  voluerat,  ligant  quae  solvi  iusserat.  Quando  clarissimis  experimentis  evinci  se  vident,  quod  dignos  et  indignos  promiscue  solvant  et  ligent.  Potestatem  usurpant  sine  scientia,  et  quanquam  negare  non  audent  ad  bonum  usum  requiri  scientiam,  potestatem  tamen  ipsam  malis  dispensatoribus  traditam  scribunt.  Atqui  haec  potestas [p. 335]  est:  quodcunque  ligaveris  aut  solveris  in  terra,  erit  in  coelis  ligatum  et  solutum.  Aut  promissum  Christi  mentiri  oportet,  aut  bene  ligant  et  solvunt,  qui  sunt  hac  potestate  praediti.  Nec  est  quod  tergiversentur:  Christi  promissum  limitari,  secundum  eius  merita  qui  ligatur  aut  solvitur.  Et  nos  etiam  fatemur,  nec  solvi  nec  ligari  posse,  nisi  dignos  qui  solvantur  aut  ligentur.  Sed  habent  evangelii  nuncii  et  ecclesia  verbum,  quo  dignitatem  hanc  metiantur.  In  hoc  verbo,  evangelii  nuncii  possunt  omnibus  remissionem  peccatorum  in  Christo  polliceri,  per  fidem;  possunt  damnationem  edicere  omnes  et  super  omnes  qui  Christum  non  amplectuntur.  In  hoc  verbo  ecclesia  pronunciat,  scortatores,  adulteros,  fures,  homicidas,  avaros,  iniquos  partem  in  regno  Dei  non  habere,  talesque  certissimis  vinculis  ligat.  Eodem  verbo  solvit,  quos  resipiscentes  consolatur.  Sed  quae  erit  isthaec  potestas,  nescire  quid  ligandum  sit  aut  solvendum,  nec  ligare  posse  aut  solvere,  nisi  scias?  Cur  ergo  dicunt,  se  absolvere  autoritate  sibi  data,  cum  incerta  sit  absolutio?  Quo  nobis  imaginaria  haec  potestas,  si  nullus  sit  usus?  Uno  autem  loco  habeo,  aut  nullum  esse,  aut  tam  incertum  esse,  ut  pro  nullo  habendus  sit.  Cum  enim  fateantur,  bonam  esse  [OS  189]  sacerdotum  partem, [p. 336]  qui  non  rite  utantur  clavibus,  potestatem  vero  sine  legitimo  usu  inefficacem  esse;  quis  mihi  fidem  faciet,  eum  a  quo  solvor  bonum  esse  clavium  dispensatorem  ?  Quod  si  malus  est,  quid  aliud  habet,  quam  frivolam  istam  solutionem:  Quid  in  te  ligandum  sit  aut  solvendum  nescio,  quando  iusto  clavium  usu  careo,  sed  si  mereris  te  absolvo?  At  tantundem  posset,  non  dico  laicus  (quando  id  aequis  auribus  non  ferrent)  sed  Turca,  aut  diabolus.  Id  enim  est  dicere:  verbum  Dei  non  habeo  certam  solvendi  regulam,  sed  auto-