1:162  [CO  1.  162]  peccatis  mandatum  et  illa  de  ligando  et  solvendo  Petro  facta  promissio,  non  alio  sunt  referenda,  quam  ad  verbi  ministerium;  quod  dum  apostolis  [OS  186]  suis  committebat  Dominus,  simul  et  hoc  ligandi [p. 330]  solvendique  munere  ipsos  instruebat.  Quae  enim  est  summa  evangelii,  nisi  quod  omnes  servi  peccati  et  mortis  solvimur  ac  liberamur  per  redemptionem  quae  est  in  Christo  Iesu?  qui  vero  Christum  liberatorem  ac  redemptorem  non  agnoscunt  ac  suscipiunt,  eos  aeternis  vinculis  damnatos  addictosque  esse?  Hanc  legationem  cum  apostolis  suis  in  omnes  nationes  perferendam  traderet  Dominus,  ut  suam  esse,  ut  a  se  profectam,  ut  a  se  mandatam  approbaret,  hoc  praeclaro  testimonio  eam  honoravit,  idque  in  singularem  consolationem,  tum  apostolorum  ipsorum,  tum  auditorum  etiam,  ad  quos  perventura  esset  haec  legatio.  Referebat  ut  apostoli  constantem  ac  solidam  suae  praedicationis  certitudinem  haberent,  quam  non  modo  infinitis  laboribus,  curis,  molestiis,  periculis,  obituri  erant,  sed  suo  demum  sanguine  obsignaturi.  Ipsam,  inquam,  non  vanam  esse  nec  inanem,  sed  potentiae  ac  virtutis  plenam.  Referebat  ut  in  tanta  anxietate  et  rerum  difficultate,  tantisque  discriminibus,  Dei  se  negotium  agere  persuasi  essent,  ut  toto  mundo  adversante  et  repugnante,  Deum  pro  se  stare  cognoscerent;  ut  Christum  doctrinae  suae  auctorem,  in  terra  aspectu  praesentem  non  habentes,  ipsum  esse  in  coelo  intelligerent,  ad  firmandam  eius  veritatem. [p. 331]  Oportebat  rursum  et  auditoribus  certissime  testificatum  esse,  illam  evangelii  doctrinam  non  apostolorum  esse  sermonem,  sed  Dei  ipsius;  non  vocem  in  terra  natam,  sed  e  coelo  delapsam.  Non  enim  in  hominis  potestate  haec  esse  possunt,  peccatorum  remissio,  promissio  vitae  aeternae,  salutis  nuncius.  Testificatus  est  ergo  Christus,  nihil  in  evangelii  praedicatione  apostolorum  esse,  praeter  ministerium;  se  esse,  qui  per  eorum  ora,  velut  per  organa,  loqueretur  omnia  et  promitteret;  peccatorum  remissionem,  quam  ipsi  annunciarent,  veram  esse  Dei  promissionem;  damnationem  quam  denunciarent,  certum  esse  Dei  iudicium.  Haec  autem  testificatio  omnibus  saeculis  data  est  firmaque  manet,  quae  certiores  omnes  securosque  reddat:  evangelii  verbum,  a  quocunque  tandem  homine  praedicatur,  ipsissimam  esse  Dei  sententiam,  apud  summum  Dei  tribunal  promulgatam,  in  libro  vitae  scriptam,  in  coelo  ratam,  fixam  et  firmam.  Habemus,  potestatem  clavium  esse  simpliciter  evangelii  praedicationem,  nec  tam  potestatem  esse  quam  ministerium,  si  ad  homines  respicimus.  Non  enim  hominibus  hanc  potestatem  proprie  Christus  dedit,  sed  verbo  suo,  cuius  homines  ministros  fecit.  Alter  locus,  quem  in  aliam  partem  accipiendum  diximus,  apud  Matthaeum  scriptus  est,  ubi  ait  Chri-  1