42:160  nom  de  Dieu,  et  de  persister  en  cette  creance  que  nous  avons  de  l'Eglise  universelle,  laquelle  ne  se  peut  pas  voir  a  l'oeil,  mais  si  est-ce  que  Dieu  la  conduit  et  gouverne,  voire  d'une  facon  qui  pourra  estre  ioconneue  et  incomprehensible  aux  hommes,  mais  c'est  aussi  a  fin  que  sa  vertu  soit  tant  mieux  conneue,  et  que  nous  adorions  ses  secrets,  que  nous  profitions  tellement  en  la  contemplation  d'iceux  qu'estans  conduits  de  Dieu  en  cette  vie  mortelle,  nous  soions  aussi  participans  de  la  vie  eternelle  qu'il  nous  a  promise.  Suivant  cette  saincte  doctrine,  nous  nous  prosternerons  devant  la  face  de  nostre  bon  Dieu,  etc.  SERMON  XLVII  sur  le  Chap.  XII.  v.  8.13.  Nous  traittames  hier  ce  qui  fust  respondu  a  l'ange,  qui  interrogoit  touchant  l'evenement  des  choses  qui  avoient  este  dittes,  car  Iesus  Christ  se  declarant  alors  en  figure,  assignoit  le  terme  d'un  temps,  et  de  deux  temps,  et  de  la  moitie  d'un,  pour  signifier  que  l'Eglise  ne  seroit  pas  affligee  seulement  pour  un  iour,  ne  pour  un  mois,  mais  qu'il  falloit  que  les  fideles  se  disposassent  a  endurer  de  grandes  angoisses,  voire  pour  long  temps.  Or  maintenant  Daniel  adiouste,  Qu'encores  n'a  il  point  entendu  cela,  il  dit  bien  qu'il  estoit  la  a  l'escole  de  Dieu  avec  les  anges,  oiant  une  mesme  lecon  et  doctrine,  mais  si  est-ce  que  son  esprit  n'a  peu  atteindre  encores  si  haut.  Dieu  donc  a  voulu  humilier  son  prophete  en  le  retenant  en  crainte,  vray  est  (comme  desia  nous  avons  dit)  qu'il  estoit  enseigne  avec  les  anges,  pour  ouir  le  fils  de  Dieu  parler,  et  contempler  les  choses  celestes,  mais  cependant  si  faut  il  qu'il  y  ait  une  bride,  a  fin  qu'il  connoisse  sa  mesure  et  la  capacite:  voila  donc  pourquoy  Dieu  ne  luy  donne  point  pleine  intelligence  des  choses,  iusques  a  ce  que  le  temps  soit  venu.  Or  si  le  prophete  Daniel  ha  este  ainsi  humilie,  que  sera  ce  de  nous?  Si  donc  nous  n'entendons  pas  toutes  choses,  que  nous  demourions  en  ignorance,  il  ne  faut  pas  que  nous  trouvions  cela  estrange,  et  ne  faut  point  aussi  que  nous  perdions  courage.  Toutesfois  on  pourroit  ici  faire  une  question,  car  Dieu  proteste  par  son  prophete  Isaie,  qu'il  ne  parle  point  en  vain  a  nous,  et  quand  il  nous  commande  de  le  cercher,  que  c'est  a  fin  que  nous  le  trouvions,  et  donne  aussi  la  promesse,  que  tous  ceux  qui  le  cercheront  le  trouveront:  voila  nostre  Seigneur  Iesus  qui  prononce,  heurtes  et  l'ouverture  vous  sera  faicte,  demandes  et  vous  obtiendres.