30:160  cordis  penetralibus  habeamus:  ac  proinde  donec  nos  mortem  velit  oppetere,  non  instruit  ea  virtute  et;  fortitudine  qua  praeditos  videmus  qui  fortiter  mortem  oppetere  non  reformidant  :  ac  proinde  in  illum  omnis  cura  nostra  reiicienda  est,  et  sperandum  fore  ut  quum  nos  in  ista  certamina  coniicere  voluerit,  virtute  invicta  etiam  induat.  Interim  tamen  nativus  ille  in  nobis  metus  et  infirmitatis  sensus  eo  acrius  stimulare  nos  debet  ad  preces  quibus  Deum  sollicitemus.  Nam  qui  se  hoc  metu  et  formidine  sentit  laborare  moleste  id  ferre  vitium  debet,  Deumque  ut  medeatur  precari.  Sperandum  tamen  nihilominus  Deum,  quum  necessitas  postularit,  auxilium  laturum,  et  ita  momento  voluntates  immutaturum,  ut  non  modo  non  formidolosa  et  amara  mors,  sed  etiam  dulcis  et  grata  futura  sit.  Observandum  etiam  non  omnes  qui  Deo  usque  ad  mortem  servierunt,  metu  et  timore  aliquo  vacuos  fuisse:  neque  enim  quod  humanum  est  exuerant.  Verum  tamen,  quum  opus  fuit,  Deus  impedimenta  sustulit  quae  ab  officio  illos  forte  deterruissent:  aut  etiam  ipsis  ne  in  certamen  venirent  pepercit:  cuiusmodi  exemplum  hic  habemus  in  Samuele.  Atque  hoc  ipsum  nos  bene  Paulus  docet,  quum  ait:  Deum  non  permissurum  nos  ultra  vires  nostras  tentari  :  sed  tentationi  bonum  exitum  daturum.  Nempe  ita  omnia  sapienter  moderatur,  ut  quum  nostrae  obedientiae  facere  experimentum  voluerit,  etiam  vires  suppeditet,  quibus  pares  efficiamur  tentationi  ferendae.  Sic  hoc  loco  Deus  Samueli  viam  ostendit,  qua  Saulis  furorem  effugiat:  qua  in  re  Deum  etiam  videmus  velut  in  infirmitate  progredi  voluisse.  Poterat  enim  alia  ratione  Samuelem  confirmare,  vel  promittendo  se  Saulis  manum  retenturum,  vel  etiam  effecturum  ne  ad  eius  aures  ista  pervenirent,  vel  denique  se  iter  et  opus  ipsius  fortunaturum  :  quae  omnia  in  manu  Domini  erant.  Verum  noluit  miraculo  rem  istam  Dominus  perficere,  sed  humana  ratione,  quamobrem  ait:  I  et  vitulam  de  armento  tolle  in  manu  tua,  et  dicito:  Ad  immolandum  Domino  veni.  Hinc  appa*  ret  quam  variis  modis  Deus  suos  protegat:  ut  aliquando  vim  suam  excellentem  exserat,  aliquando  veluti  occultet,  adeo  ut  nostri  curam  abiecisse  videatur,  et  nihilominus  tamen  nos  protegat  et  tueatur,  licet  modis  infirmis  et  hominibus  incognitis.  Hic  vero  non  dubium  est  quin  Samuelis  obedientiam  explorare  voluerit  :  quum  specie  sacrificii  misit  illum  ad  Davidem  inaugurandum.  Nam  et  poterat  iterum  excipere,  Saulis  ad  aures  etiam  istud  perventurum,  et  famam  ea  de  re  statim  manaturam:  non  posse  tam  occulte  fieri  unctionem  quin  aliquis  conscius  adesset.  Verum,  istis  omnibus  omissis,  Samuel  moras  omnes  abrumpens  accepto  mandato  rem  aggreditur.  Quare  etsi  multae  nos  difficultates  urgeant,  et  initio  retrogradi  simus  quum  nos  progredi  Dominus  iubet  :  tamen  de  ipsius  voluntate  facti  cer-