27:160  tion.  Or  Moyse  ayant  ainsi  parle,  monstre  que  ce  n'est  point  le  tout,  qu'on  ait  ainsi  aboli  les  idoles:  mais  que  le  principal  est,  d'establir  le  pur  service  de  Dieu,  de  le  remettre  au  dessus,  et  de  le  restaurer.  Et  ceci  est  bien  a  noter:  car  nous  en  verrons  beaucoup  auiourd'huy  qui  se  mocqueront  assez  des  follies  du  Pape,  et  des  abus  qui  regnent  sous  sa  tyrannie:  ils  oseront  bien  manger  chair  en  vendredi,  ils  n'en  tiendront  pas  grand  conte,  ne  de  Karesme,  ne  de  vigiles,  ne  de  prendre  eau  benite,  ne  de  baiser  les  reliques,  ne  de  courir  en  pelerinage,  ne  de  tous  ces  autres  menus  fatras  qui  sont  la:  ils  n'auront  pas  grande  devotion  a  la  messe,  ni  a  confesse,  ils  ne  se  soucieront  gueres  des  trespassez,  ne  de  faire  chanter  pour  les  morts.  Nous  verrons  donc  beaucoup  de  gens  qui  sauront  bien  mespriser  toutes  les  superstitions  de  la  Papaute,  mesmes  ils  s'en  mocqueront,  et  les  condamneront  pleinement.  Mais  quoy?  Il  n'y  a  nulle  crainte  de  Dieu,  il  n'y  a  nulle  religion.  Or  il  vaudroit  mieux  qu'ils  fussent  encores  abrutis  en  leur  ignorance,  que  de  venir  en  un  tel  mespris  pour  hurter  comme  bestes  sauvages  contre  toute  maieste  Divine,  et  ne  point  sentir  qu'il  y  a  un  Dieu  qui  regne  sur  tout  le  monde.  Ce  n'est  donc  pas  beaucoup  profite,  d'avoir  aboli  les  idoles:  mais  il  faut  que  la  vraye  religion  s'establisse.  Comme  quand  il  y  aura  quelque  maison  mal  bastie,  si  on  dit:  Et  ceci  ne  vaut  rien,  ou  qu'il  y  ait  des  vices:  ce  sera  donc  bien  fait  de  la  demollir.  Mais  si  on  la  laisse  la  en  tel  estat,  encores  il  eust  mieux  valu  avoir  la  quelque  trou  pour  se  loger,  combien  que  cela  fust  mal  sain,  et  qu'il  y  eust  beaucoup  de  vices,  on  s'en  serviroit  tellement  quellement:  mais  si  on  destruit,  et  qu'on  rase  tout,  et  cependant  qu'on  ne  redifie  point:  ou  sera-ce  aller?  Notons  bien  donc  que  Moyse  nous  apporte  ici  une  doctrine  parfaicte,  laquelle  consiste  en  deux  reigles.  C'est  que  nous  adorions  nostre  Dieu  purement:  et  puis,  que  toutes  superstitions  soyent  abbattues,  afin  que  rien  n'empesche  que  Dieu  ne  soit  honore,  comme  il  en  est  digne,  et  qu'on  ne  regarde  a  luy,  et  qu'on  se  tienne  a  sa  seule  maieste.  Or  en  premier  lieu  il  parle  d'abolir  toutes  superstitions.  Et  pourquoy?  Car  si  on  veut  cultiver  un  champ  pour  y  semer,  il  faudra  bien  s'il  est  plein  de  ronces,  et  d'espines,  et  de  mauvaises  herbes,  qu'on  deffriche  en  premier  lieu:  ou  bien  devant  qu'y  ietter  la  semence,  il  faudra  que  la  charrue  y  passe,  pour  faire  mourir  les  mauvaises  herbes.  Ainsi  faut-il  que  les  corruptions  soyent  ostees  du  milieu  de  nous,  pour  nous  ranger  au  service  de  Dieu.  Car  on  aura  beau  nous  prescher  qu'il  y  a  un  Dieu,  lequel  nous  devons  adorer:  si  desia  nous  sommes  preoccupez  de  mauvaises  phantasies,  ou  d'imaginations  frivoles,  on  ne  profitera  rien:  que  tousiours  nostre  esprit  sera  em-