43:16  posteri  Loth,  quemadmodum  satis  notum  est.  Loth  autem  fuerat  habitus  quasi  filius  Abrahae:  nec  dubium  est  quin  Abraham,  quum  eum  adduceret  secum  ex  patria,  aluerit  cum  pro  filio.  Erat  igitur  Abraham  communis  pater  tam  Iudaeis  quam  Ammonitis.  Nunc  quum  filii  Ammon  nullo  coniunctionis  illius  respectu  vires  suas  coniungunt  cum  hostibus,  et  simul  conspirant,  non  potest  excusari  eorum  crudelitas.  Interea  non  dubium  est  quin  multis  aliis  sceleribus  fuerint  obstricti.  Nam  Deus  per  prophetam  suum  non  enumerat  singula  peccata,  de  quibus  exigere  vindictam  statuerat,  sed  tantum  digito  quasi  in  transitu  notat  peccatum  unum,  et  in  genere  pronuntiat  singulos  populos  esse  prorsus  desperatos,  quia  obduruerant  omnes  in  sua  malitia.  Dicit  ergo  de  filiis  Ammon,  quod  secuerint  gravidas.  Quidam  nnn  accipiunt  pro  onn,  pro  montibus:  et  tamen  non  video  quae  ratio  eos  inducat,  nisi  quia  putabant  absurdum  esse  secari  mulieres  gravidas,  ut  Ammonitae  suos  fines  longius  extenderent:  hoc  autem  melius  quadrabat  in  montes,  quasi  diceret,  secuerunt  montes,  hoc  est,  terram  ipsam:  nullum  fuit  impedimentum,  quod  non  perrumperent  Ammonitae:  ita  eos  accendit  sua  cupiditas  inexplebilis,  ut  montes  ipsos  secuerint,  hoc  est  violaverint  omnem  ordinem  naturae.  Alii  metaphorice  montes  accipiunt  pro  urbibus  munitis.  Nam  si  quis  regnum  occupare  velit,  urbes  sunt  oppositae  instar  montium.  Sed  ista  expositio  nimis  est  coacta.  Iam  quum  nnn  sint  mulieres  gravidae,  non  dubito  quin  debeat  hoc  nomen  accipi  in  sensu  genuino  et  consueto:  sicuti  etiam  vidimus  apud  Hoseam.  Cur  autem  dicit  propheta  Ammonitas  secuisse  mulieres  gravidas?  Quasi  diceret  adeo  furiosam  fuisse  eorum  avaritiam,  ut  nullum  omiserint  genus  saevitiae.  Fieri  poterit,  ut  quispiam  devoret  sua  cupiditate  totam  terram,  et  tamen  ad  clementiam  sit  propensus.  Alexander  Macedo,  etiamsi  esset  homo  sanguinarius,  tamen  prae  se  tulit  speciem  aliquam  clementiae:  alii  autem  sunt  multo  truculentiores,  quemadmodum  dicit  Iesaias  (13,  17)  de  Persis,  non  appetent  pecuniam,  sed  sanguinem  haurient.  Sic  etiam  hoc  loco  dicit  propheta  de  Ammonitis,  non  modo  illicitis  artibus  propagasse  suos  fines,  usos  fuisse  violentia,  et  fuisse  praedones,  qui  rapuerint  bona  aliena,  sed  dicit  ne  gravidis  quidem  mulieribus  pepercisse.  Hoc  autem  est  extremum  in  urbium  expugnatione.  Si  qua  urbs  fatigaverit  hostem  suum,  in  ipso  ardore  poterunt  et  gravidae  mulieres  interfici,  et  pueri  et  infantes.  Sed  illud  est  rarum  exemplum,  nec  solet  admitti,  nisi  quum  cogit  extrema  necessitas.  Exprobrat  igitur  Ammonitis,  quod  non  tantum  avari  fuerint,  sed  etiam  nullum  omiserint  genus  crudelitatis,  ut  suam  cupiditatem  explerent.  Secuerunt  ergo  gravidas  mulieres,  ut  propagarent  suos  terminos,  ego  igitur  accendam  ignem  in  muro  rCD  qui  vorabit