39:16  non  tantum  superat,  sed  etiam  absorbet.  Deinde  adiungit  exsequutionem  consilii,  hoc  est  testimonia  illius  sapientiae  quae  nobis  apparet.  Ex  operibus  Dei  colligimus  quanta  sit  et  quam  incomparabilis  eius  sapientia.  Nam  illa  per  se  non  posset  comprehendi,  imo  ne  minimum  quidem  eius  gustum  perciperent  homines,  nisi  conspicua  esset  in  operibus.  Opera  igitur  Dei  propter  suam  excellentiam  testimonia  sunt  immensae  eius  sapientiae.  Hac  ratione  et  hoc  sensu  propheta  vocat  Deum  magnum  consilio  et  magnum  opere.  Addit,  oculos,eius  apertos  esse  super  omnes  vias  hominum:  quibus  verbis  significat  esse  totius  mundi  iudicem.  Et  quidquid  homines  vel  consultant  vel  loquuntur,  vel  etiam  opere  perpetrant,  id  venturum  in  rationem.  Summa  est,  Dei  providentiam  sic  extendi  in  omnes  mundi  partes,  ut  opera  hominum  minime  eum  lateant,  nec  quisquam  possit  effugere  manum  eius.  Postquam  enim  loquutus  est  de  oculis  Dei,  adiungit,  Ut  reddat  cuique  secundum  vias  eius:  et  secundum  fructum  operum  eius.  Hic  ergo  non  disserit  propheta  de  aliqua  otiosa  speculatione  qualem  fingunt  profani  homines.  Fatentur  enim  omnia  esse  sub  Dei  conspectu:  sed  imaginantur  ipsum  contentum  esse  nuda  illa  et  inani  consideratione.  Atqui  hoc  modo  spoliaretur  honore  et  officio  iudicis.  Propheta  ergo  hic  demonstrat  finem  providentiae  Dei,  cur  Deus  habeat  apertos  oculos,  nempe  ut  tandem  ad  tribunal  suum  vocet  omnia  hominum  dicta  et  facta,  imo  etiam  cogitationes.  Caeterum  docemur  his  verbis  non  posse  vitam  nostram  recte  institui,  nisi  semper  nobis  in  memoriam  veniat  Dei  praesentia,  ut  sciamus  nos  esse  sub  eius  oculis,  et  nihil  esse  ei  absconditum.  Unde  enim  tanta  peccandi  licentia,  nisi  quod  homines  quasi  fugitivi  lasciviunt?  quemadmodum  si  quis  filius  contumax  possit  se  subducere  ab  oculis  patris,  tunc  toto  impetu  sese  proiicit  ad  peccandum,  quia  scilicet  solutus  est  omni  metu  et  verecundia:  ita  stupor  noster  similis  est  fugae,  quia  putamus  nos  procul  remotos  esse  a  Deo.  Ergo,  sicuti  iam  dixi,  semper  illud  tenendum  est,  Oculos  Dei  apertos  esse  super  omnes  vias  nostras,  et  in  quem  finem?  ut  scilicet  rependat  cuique  secundum  vias  eius,  et  quisque  colligat  fructum  operum  suorum.  Tametsi  ergo  Deus  ad  tempus  conniveat,  neque  re  ipsa  demonstret  se  esse  hominum  iudicem,  non  est  tamen  cur  debeat  nobis  torpor  obrepere,  quasi  elapsi  essemus  ex  eius  manu:  sed  sciamus  nunc  ab  ipso  reputari  omnia  nostra  opera  et  dicta,  ut  aliquando  demonstret  se  non  esse  otiosum  speculatorem,  quemadmodum  somniant  profani  homines,  sed  esse  oculatum  testem  rerum  omnium,  ut  tandem  iudex  appareat.  Quod  autem  hic  locus  a  papistis  trahitur  ad  operum  merita,  nimis  frivolum  est.  Nam  quoties  scriptura  affirmat  rependi  cuique  secundum  opera  sua,  non  excludit  gratuitam  Dei  miseri-