37:16  interposita  nube  potentia  Dei  obscuratur:  haeremus  attoniti,  ac  si  a  Domino  destituti  ac  neglecti  essemus.  Ne  quid  igitur  hic  vulgare  dici  arbitremur  :  quia  si  bene  insideret  animis  nostris  haec  persuasio  potentiae  Dei,  nunquam  ita  agitaremur,  neque  nos  adversae  calamitates  ullae  perturbarent.  Huic  potentiae,  ut  dictum  est,  innixus  fuit  Abraham,  quo  secure  posset  amplecti  quod  alioqui  incredibile  erat.  Ideo  affirmat  Paulus  ipsum  sperasse  praeter  spem:  posse  enim  facere  Deum  sibi  persuasit  quae  dixerat,  nec  fluctuatus,  aut  animo  debilitatus  est.  Docemur  ergo  oculos  attollere  supra  hunc  mundum,  ne  ex  specie  rerum  iudicemus,  sed  futurum  statuamus  quod  a  Deo  dictum  est:  quod  omnia  in  eius  arbitrio  posita  sint.  Haec  persuasio  quum  necessaria  sit  omnibus,  tum  vero  Iudaeis  ea  maxime  opus  fuisse  merito  dixi.  Urgebantur  enim  a  potentissimis  hostibus,  praeclusi  erant  aditus,  nulla  spes  libertatis  erat:  nihil  undique  apparebat  praeter  vastam  et  horridam  solitudinem.  Quamobrem  frustra  ipsis  allata  fuisset  consolatio,  nisi  moniti  a  propheta  mentes  in  coelum  extulissent,  totumque  animum  suum,  praetermissa  rerum  specie,  in  potentiam  Dei  unice  intendissent.  Dum  mensuras  nominat,  quibus  homines  in  minimis  rebus  utuntur,  accommodat  sese  ruditati  nostrae.  Sic  enim  nobiscum  Dominus  balbutire  solet,  atque  similitudines  mutuari  a  rebus  quae  nobis  usitatae  sunt,  quum  de  maiestate  sua  loquitur  :  ut  melius  magnitudinem  eius  et  praestantiam  rudes  et  angustae  mentes  percipiant.  Facessant  igitur  omnes  crassae  de  Deo  imaginationes:  quoniam  magnitudine  sua  absorbet  omnes  creaturas,  ut  nihil  prae  ipso  sint  coelum,  terra,  mare,  et  quidquid  in  eis  continetur,  tametsi  immensa  eorum  magnitudo  sit.  13  et  14.  (Quis  erudivit.)  Nunc  de  sapientia  Domini  idem  subiicit  propheta,  quod  de  eius  bonitate  et  potentia  docuerat.  Ac  notanda  est  connexio,  quia  sicuti  maligne  Dei  virtutem  restringit  carnis  sensus  ad  terrena  media,  sic  perperam  incomprehensibile  eius  consilium  humanis  rationibus  subiicit.  Donec  emineat  Deus  supra  omnes  creaturas,  multa  sese  ingerunt  quae  cursum  operum  eius  impediant.  Ergo  si  ex  nostra  opinione  iudicium  facimus,  obrepent  protinus  variae  dubitationes.  Sic  quoties  non  apparet  quomodo  hoc  vel  illud  facturus  sit  Deus,  an  futurum  sit  ambigimus,  quia  impossibile  videtur  quod  rationem  nostram  exsuperat.  Ergo  ut  nostrae  infirmitati  potentiam  Dei  opponere  convenit:  sic  audaciam  nostram  compescere  debet  incomparabilis  eius  sapientia.  Quaerens  an  quis  aptaverit  vel  direxerit  spiritum  Dei,  significat  non  opus  fuisse  magistro  qui  praeiret,  vel  de  rebus  incognitis  eum  moneret.  Spiritum  autem  pro  ratione,  iudicio,  vel  mente  accipit.  Mutuatur  enim  similitudinem  ex  hominum  natura,  quo  magis  se  illis