3:16  nant  que  personne  ne  sonne  mot  contre  l'authorité  de  nostre  mere  saincte  Eglise:  c’est  à  dire,  selon  leur  intention,  du  siege  Romain.1)  Pourquoy  combattent-ils  d'une  telle  rigueur  et  rudesse  pour  la  Messe,  le  Purgatoire,  les  pelerinages  et  tels  fatras,  tellement  qu'ils  nient  la  vraye  pieté  pouvoir  consister,  si  toutes  ces  choses  ne  sont  creues  et  tenues  par  foy  tresexplicite,  combien  qu'ils  n'en  preuvent  rien  par  la  parolle  de  Dieu?  Pourquoy,  dy-ie,2)  sinon  pourtant  que  leur  ventre  leur  est  pour  dieu,  la  cuisine  pour  religion:  lesquels  ostez,  non  seulement  ils  ne  pensent  pas  qu'ils  puissent  estre  Chrestiens,  mais  ne  pensent  plus  estre  hommes?  Car  combien  que  les  uns  se  traitent  delicatement  en  abondance,  les  autres  vivotent  en  rongeant  des  croustes,  toutesfois  ils  vivent  tous  d'un  pot:  lequel  sans  telles  aides  non  seulement  se  refroidiroit,  mais  geleroit  du  tout.  Pourtant  celuy  d'eux  qui  se  soucie  le  plus  de  son  ventre,  est  le  meilleur  zelateur  de  leur  foy.  Bref,  ils  ont  tous  un  mesme  propos,  ou  de  conserver  leur  regne,  ou  leur  ventre  plein.  Et  n'y  en  a  pas  un  d'eux  qui  monstre  la  moindre  apparence  du  monde  de  droit  zele:  et  neantmoins  ils  ne  cessent  de  calomnier  nostre  doctrine,  et  la  descrier  et  diffamer  par  tous  moyens  qu'il  leur  est  possible,  pour  la  rendre  ou  odieuse,  ou  suspecte.  Ils  l'appellent  Nouvelle,  et  forgée  puis  nagueres.  Ils  reprochent  qu'elle  est  douteuse  et  incertaine.  Ils  demandent  par  quels  miracles  elle  est  confermée.  Ils  enquierent  si  c'est  raison3)  qu'elle  surmonte  le  consentement  de  tant  de  Peres  anciens,  et  si  longue  coustume.  Ils  insistent,  que  nous  la  confessions  estre  schismatique,  puis  qu'elle  fait  la  guerre  à  l’eglise:  ou  que  nous  respondions,  que  l'Eglise  a  esté  morte  par  tant  longues  années,  ausquelles  il  n'en  estoit  nulle  mention.  Finalement,  ils  disent,  qu'il  n'est  ia  mestier  de  beaucoup  d'argumens,  veu  qu'on  peut  iuger  des  fruits  quelle  elle