10.1:159  CONSILIA.  quid  nobis  videatur  de  eo  quod  est  a  vobis  propositum.  A  o  primum  quidem  valde  mirati  sumus,  quum  audivimus,  in  ea  confessione  quae  requiritur  a  vobis,  nihil  videri  vobis  inesse  quod  Dei  verbo  directe  repugnet.  Atque  in  eo  existimamus  metu  vobis  praestrictos  fuisse  oculos.  Nam  in  articulo  baptismi  damnantur  nominatim,  qui  existimant  infantes  a  nativitate  esse  sanctificatos.  Et  quod  ad  coenam,  dicunt  Iudam  non  minus  corporis  Christi  participem  fuisse,  quam  Petrum.  Item  illud,  quod  Christus  in  sua  humana  natura  ubique  sit,  uti  ipsi  videtur,  quum  Deus  sit  et  homo:  quasi  unitas  personae  confusionem  divinae  et  humanae  naturae  afferret.  Quod  affertis  ista  non  esse  proprie  confessionem  fidei,  nihil  aliud  est  (quod  cum  bona  venia  dictum  sit)  quam  effugium,  ad  dissimulandum  malum  vel  conterendum.  Porro  Dominus  non  est  sophista,  ut  sibi  illudi  eiusmodi  cavillationibus  sinat.  Utcunque  igitur  aliud  nomen  vel  titulum  scripto  illi  imponatis,  testamini  tamen  cum  solenni  iureiurando,  ita  vestram  'fidem  habere.  Atque  ut  ad  Deum  usque  non  ascendatur,  tamen  apud  homines  etiam  ita  spondendo  bilingues  estis,  ut  perfidiae  notam  evitare  non  possitis.  Ut  enim  bona  sit  illorum  intentio,  a  quibus  vobis  ista  proponuntur:  non  est  hoc  tamen  satis,  si  ad  rectum  finem  per  media  minus  licita  tenditis.  Petimus  igitur  a  vobis  per  Dominum,  si  ad  tempus  ita  consopiti  fuistis,  ut  nunc  serio  expergefiatis.  Ut  enim  sincere  dicamus  quod  res  est,  non  potest  scriptum  eiusmodi  admitti,  quin  simul  oblique  abrenuncietur  Dei  veritati,  quae  una  nobis  non  quavis  statione  modo,  sed  vita  ipsa  carior  debet  esse.  Hoc  est  autem  remedium,  si  ita  reponatis,  baptismum  infantibus  superfluum  non  esse,  quia  promissione  sanctificati  sint,  quum  sacramentum  sit  confirmatio  necessaria  propter  humanam  infirmitatem,  ut  ita  promissio  secum  trahat  comes  sacramentum,  nedum  ut  illius  contemptum  invehat.  In  articulo  de  coena  sic  reponatis,  substantiam  veri  corporis  et  sanguinis  Iesu  Christi,  uti  ex  utero  Virginis  illam  semel  accepit,  praesentem  esse  in  coena  tam  fidelibus  quam  infidelibus:  et  quamvis  soli  fideles  revera  et  efficaciter  percipiant,  non  minus  tamen  infideles  reos  teneri  corporis  et  sanguinis  Domini,  quia  sacramentum  polluerint.  Item  horum  verborum  loco:  Reiicimus  doctrinam  illorum  qui  tradunt  non  percipi  Christum  nisi  spiritualiter,  reponatis:  Qui  tradunt  non  percipi  nisi  spiritum  Christi,  carne  nimirum  et  sanguine  exclusis.  Scriptum  est  enim:  Caro  mea  vere  est  cibus,  et  sanguis  meus  vere  est  potus  (Ioann.  6,  55).  Et  quamvis  illa  perceptio  spiritualis  sit,  non  ideo  minus  tamen  fit  re  ipsa,  neque  in  sola  phantasia  vel  opinione  consistit.  Item  horum  verborum  loco:  Christum  secundum  naturam  humanam  sedere:  Confitemur