55:158  cogitationes  emergit,  ut  quod  iussus  est  exsequatur.  Si  haec  admirabilis  fuit  virtus,  per  tot  actam  ardua  obstacula  eluctari:  merito  summam  laudem  habet  fides,  quae  sola  fecit  ut  invictus  Abraham  perstaret.  Sed  hic  exoritur  non  parva  difficultas:  quomodo  laudetur  Abrahae  fides,  dum  a  promissione  discedit.  Nam  sicuti  ex  fide  obedientia,  ita  ex  promissione  fides  nascitur.  Ubi  ergo  promissione  destituitur  Abraham,  concidat  eius  fides  necesse  est.  Porro  mors  Isaac,  ut  iam  dictum  est,  omnium  promissionum  quidam  veluti  interitus  fuit:  neque  enim  quasi  unus  aliquis  ex  vulgo  hominum  considerandus  est  Isaac,  sed  qui  inclusum  in  se  Christum  habet.  Hanc  quaestionem,  quae  difficilis  alioqui  ad  solvendum  esset,  expedit  apostolus,  quum  mox  subiicit,  Abraham  tribuisse  hoc  honoris  Deo,  quod  filium  posset  ex  mortuis  excitare.  Ergo  datam  sibi  promissionem  non  abiicit:  sed  vim  eius  ac  veritatem  extra  filii  vitam  extendit,  quia  Dei  potentiam  tam  angustis  finibus  non  limitat,  ut  mortuo  Isaac  vel  alligata  sit  vel  exstincta.  Hoc  modo  promissionem  retinuit,  quia  Dei  potentiam  non  affixit  vitae  Isaac  :  sed  persuasum  habuit,  in  eius  mortui  cineribus  non  minus  quam  in  vivo  et  spirante  fore  efficacem.  19.  Unde  eum  quoque.  Ac  si  diceret:  Neque  haec  spes  frustrata  est  Abrahamum,  quia  haec  quaedam  resurrectionis  fuit  species,  quod  subito  liberatus  fuit  ex  media  morte.  Nomen  parabolae  quod  hic  ponitur,  varie  exponunt  interpretes.  Ego  simpliciter  accipio  pro  similitudinis  nota.  Tametsi  enim  vere  non  resurrexit  Isaac,  quodammodo  tamen  videtur  resurrexisse  quum  repente  ac  mirabiliter,  inexspectata  Dei  gratia,  eripitur.  Neque  tamen  displicet  quod  alii  in  ariete,  qui  subrogatus  est  in  locum  Isaac,  carnem  nostram  designari  putant,  quae  morti  subiicitur.  Fateor  etiam  verum  esse  quod  alii  tradunt,  in  hac  immolatione  pictam  fuisse  Christi  imaginem.  Sed  nunc  quid  senserit  apostolus,  non  quid  vere  dici  possit,  disputo.  Hic  autem,  meo  iudicio,  genuinus  est  sensus:  quod  Abraham  non  aliter  filium  suum  recepit,  quam  si  illi  ex  morte  restitutus  esset  in  novam  vitam.  10.  Fide  Isaac.  Hoc  etiam  fidei  opus  fuit,  de  futuris  benedicere,  quia  ubi  res  non  exstat,  sed  nudum  verbum  apparet,  necesse  est  solam  fidem  regnare.  Sed  primo  loco  notandum  est  quid  valeat  benedictio  de  qua  loquitur:  nam  saepe  generaliter  benedicere  pro  bene  precari  accipitur.  Sed  longe  alia  ratio  fuit  benedictionis  Isaac:  erat  enim  quasi  missio  in  possessionem  eius  terrae  quam  Deus  illi  et  posteris  promiserat.  Atqui  in  ea  nihil  habet  prorsus  nisi  ius  sepulcri.  Ridiculae  ergo  videntur  magnificiae  illae  voces,  Serviant  tibi  populi,  et  tribus  te  adorent  (Gen.  27,  29).  Qualem  enim  dominium  tradere  potuit,  qui  ipse  vix  liber  erat?  Videmus  itaque  hanc  benedictionem  fide  niti,  quia  nihil  praeter