27:158  que  nous  ne  soyons  la  enserrez  pour  servir  simplement  a  Dieu  comme  il  le  commande.  Voila  donc  la  premiere  raison,  que  ceux  qui  voudront  servir  Dieu  a  leur  phantasie,  entreront  tousiours  en  un  abysme  dont  ils  ne  pourront  sortir,  et  d'une  superstition  ils  tomberont  en  l'autre.  Voila  pour  un  item.  Mais  d'autre  coste,  nous  voyons  quelle  condamnation  ce  sera  a  nous,  quand  nous  ne  pourrons  point  dedier  nostre  vie  a  Dieu,  veu  que  les  idolatres  sont  ainsi  transportez  de  leurs  fols  appettits,  et  que  ce  n'est  iamais  fait,  qu'ils  ne  se  peuvent  contenter  en  leurs  superstitions:  si  de  nostre  part  nous  ne  cerchons  de  nous  tenir  en  l'obeissance  de  nostre  Dieu,  que  sera-ce?  Car  Dieu  nous  a  mis  un  ioug  sur  le  col  qui  est  assez  gracieux.  Il  a  regard  a  nostre  infirmite,  il  nous  donne  vertu  telle  qu'il  sait  nous  estre  propre,  il  nous  supporte  tant  humainement  que  rien  plus:  et  cependant  encores  ne  peut-il  chevir  de  nous,  que  nous  sommes  tant  delicats  que  c'est  pitie:  nous  nous  plaignons:  Et  comment?  Dieu  nous  presse  trop.  Que  si  nous  l'avons  servi  a  demi,  voire  a  la  centiesme  partie,  il  nous  semble  qu'il  se  doit  bien  contenter.  Et  cependant  les  idolatres  se  tormentent  tant  et  plus,  ils  sont  la  comme  des  povres  ames  damnees,  et  sont  tousiours  prests  d'augmenter  leurs  superstitions.  Advisons  bien  donc  a  nous.  Et  puis  qu'il  ne  nous  soit  pas  licite  de  rien  attenter  outre  la  volonte  de  Dieu,  mais  qu'il  nous  faut  cognoistre  ce  qu'il  demande  de  nous,  et  nous  assuiettir  pleinement  a  luy:  que  nous  ayons  une  bonne  affection,  et  paisible,  pour  porter  patiemment  le  ioug  que  Dieu  nous  met  sus,  veu  qu'il  n'est  pas  ne  dur  ne  fascheux  (comme  nous  avons  dit)  veu  que  les  idolatres  poursuyvent  ainsi,  et  que  rien  ne  les  empesche  qu'ils  ne  trottent,  qu'ils  ne  courent,  et  qu'ils  ne  volent  quasi  pour  servir  a  leurs  idoles:  et  que  nous  marchions  pour  le  moins,  quand  nous  voyons  que  nostre  Seigneur  nous  monstre  le  chemin,  et  qu'il  nous  monstre  un  chemin  qui  nous  sera  bien  difficile,  voire  selon  nostre  corruption:  mais  selon  la  grace  de  son  sainct  Esprit  il  nous  sera  facile  et  aise.  Il  y  a  d'avantage,  que  Moyse  ne  dit  pas  ici,  que  les  Iuifs  par  tout  ou  ils  viendront,  raseront  et  briseront  les  idoles:  mais  Dieu  commande  de  ce  faire  en  la  terre  qui  leur  est  donnee  en  heritage.  En  quoy  nous  voyons  que  le  S.  Esprit  ne  commande  point  en  general  a  tous  fideles  d'abbattre,  et  de  rompre  toutes  les  idoles  qui  sont  au  monde:  mais  la  ou  ils  ont  puissance.  Et  c'est  un  poinct  qui  est  bien  a  noter.  Car  si  nous  sommes  entre  les  idolatres,  il  n'est  point  en  nous  de  purger  la  terre  des  superstitions  qui  y  regnent.  Que  faut-il  donc?  Qu'un  chacun  se  reforme  en  son  coeur,  que  les  idoles  soyent  abbattues  de  la.  Quand  ie  verray  que  le  service  de  Dieu