55:157  157  CAPUT  XL  158  ab  uniuscuiusque  concupiscentia  :  neque  tamen  interea  negat  quin  experimentum  capiat  Deus  nostrae  integritatis  et  obedientiae.  Quamquam  non  ita  nos  explorat  Deus,  quasi  alias  ignoret  quid  in  corde  nostro  lateat.  Nulla  inquam  probatione  indiget  Deus,  ut  nos  cognoscere  incipiat  :  sed  quum  in  lucem  nos  producit  ut  operibus  palam  testemur  quod  ante  absconditum  erat,  dicitur  nos  experiri  aut  probare  :  deinde  quod  re  ipsa  palam  fit,  Deo  innotescere  dicitur.  Haec  enim  satis  familiaris  est  ac  frequens  scripturae  loquutio,  ut  quod  in  homines  competit,  Deus  in  se  transferat.  Immolatio  Isaac  ab  animi  affectu  censetur:  quia  per  Abraham  non  stetit  quominus  quod  sibi  mandatum  erat,  perageret.  Haec  voluntas  obsequendi  perinde  valet  ac  si  immolasset  filium.  Ac  unigenitum  obtulit.  Hic  circumstantiis  notare  voluit  quanta  fuerit  et  quam  acris  probatio  Abrahae.  Quamquam  aliae  etiam  ex  Mosis  historia  petendae  sunt,  quae  eodem  pertinent.  Iubetur  Abraham  accipere  filium  suum,  unigenitum  suum  et  sibi  dilectum  Isaac,  ducere  in  locum  qui  postea  monstrandus  erat,  ibique  manu  propria  eum  mactare.  Blandas  illas  appellationes  data  opera  congerit  Deus,  ut  intimum  sancti  viri  cor  perfodiat  totidem  vulneribus.  Deinde  quo  magis  eum  excruciet,  iubet  eum  conficere  iter  tridui.  Quam  acre  illi  tormentum  fuisse  putamus,  quod  filium  semper  habet  in  conspectu,  quem  iam  cruentae  neci  destinavit?  Quum  ad  locum  ventum  est,  novo  adhuc  vulnere  pectus  eius  Isaac  transfigit,  dum  interrogat  ubinam  sit  hostia.  Quaelibet  mors  filii  nimium  acerba  fuisset:  mors  sanguinaria  maiorem  habuisset  luctum:  quod  autem  sua  eum  manu  iubetur  mactare,  id  vero  atrocius  est,  quam  ut  paterno  animo  sit  tolerabile.  Millies  exanimari  potuit,  nisi  fides  cor  eius  extra  mundum  sustulisset.  Ergo  non  abs  re  commemorat  apostolus  tunc  fuisse  tentatum.  Quaeritur  tamen  cur  Isaac  unigenitus  vocetur,  quum  ante  eum  genitus  esset  Ismael,  qui  adhuc  superstes  erat.  Respondeo,  quum  Dei  oraculo  abdicatus  esset  ex  familia,  quasi  instar  mortui  fuisse  habitum:  ut  saltem  inter  filios  Abrahae  locum  non  teneret.  Quum  promissiones  accepisset.  Quaecunque  hactenus  retulimus,  utcunque  animum  Abrahae  penitus  vulneraverint,  prae  hac  tamen  tentatione  quasi  leves  punctiones  fuerant,  quod  acceptis  promissionibus  iubetur  filium  suum  Isaac  interficere.  Omnes  enim  promissiones  in  hac  fundatae  erant:  In  Isaac  vocabitur  tibi  semen  :  quoniam  hac  sublata,  nulla  spes  benedictionis  aut  gratiae  reliqua  fiebat.  Hic  nihil  terrenum  veniebat  in  quaestionem:  sed  aeterna  Abrahae  salus,  imo  totius  mundi.  Quantis  angustiis  districtum  fuisse  putamus  sanctum  hominem,  quum  illi  in  mentem  veniret,  in  filii  persona  spem  aeternae  vitae  exstingui?  et  tamen  fide  supra  has