30:157  157  IN  I.  LIB.  SAMUEL.  CAP.  XVI.  158  videatur  :  cuius  etiam  fructus  diu  fuit  occultus  :  primo  ridiculum  iocum  dicas  istam  Davidis  inaugur  ationem,  qui  statim  ab  unctione  revertitur  ad  ovium  septa,  fratribus  ipsius  interim  ad  bellum  proficiscentibus,  ut  deinceps  audituri  sumus,  et  Saule  suam  dignitatem  adhuc  retinente.  Quamobrem  discamus  non  ferre  iudicium  de  divinis  operibus  ex  iis  quae  primo  apparent:  sed  sciamus  Deum  velle  omnem  nobis  occasionem  tollere  gloriae  et  arrogantiae,  quum  tam  infirmis  mediis  suum  opus  perficit,  et  virtutem  eius  magnifaciamus,  ea  credentes  quae  nostris  sensibus  comprehendere  non  possumus.  Nam  si  Deus  statim  ab  initio  brachium  suum  exsereret,  coelumque  et  terram  concuteret,  et  ut  gloriam  suam  demonstraret  omnia  elementa  commoveret,  quis  tum  locus  esset  fidei,  quum  vel  invitos  omnes  ad  tam  mirabilia  Dei  opera  obstupescere  necesse  esset?  At  fides  est  illud  quo  exstant  quae  sperantur,  et  quae  demonstrat  quae  non  cernuntur.  Itaque  quum  Deus  in  infirmitate  operatur,  et  initia  operum  ipsius  sunt  contemptibilia,  illa  tamen  ad  exitum  perducit  admirabilem,  ut  omnium  hominum  vires  superare  necesse  sit  confiteri.  Qua  in  re  satis  amplum  habemus  argumentum  exercendae  nostrae  fidei.  Nam  ita  sese  nobis  maxime  patefacit  admirabilis  illa  Dei,  quam  profani  homines  contemnunt,  providentia,  in  qua  conquiescimus,  illum  sperantes  impleturum  quae  nostris  mentibus  assequi  non  possumus.  Atque  hac  ratione  fit  conspicua  nostra  fides,  et  Deus  in  suis  operibus  glorificatur.  Hanc  ob  causam  videmus  Deum  iam  inde  ab  omni  saeculo  virtutem  suam  obscuris  mediis  illustravisae,  tanquam  si  tantum  in  coelo,  non  autem  in  his  terris,  splenderet,  quo  fideles  patienter  exspectare  discerent,  quod  experientia  non  poterat  docere.  In  primis  autem  haec  doctrina  usurpanda  est  in  salutis  nostrae  negotio,  et  salutis  nostrae  auctore  Domino  nostro  Iesu  Christo:  quem  videmus  primo  exinanitum  antequam  in  gloriam  eveheretur.  Nam  etsi  regia  stirpe  natus  est,  satis  tamen  ex  prophetae  scriptis  apparet,  nullam  amplius  in  illa  domo  reliquam  regiae  dignitatis  notam,  quandoquidem  fideles  ad  Isai  patrem  Davidis  revocantur,  qui  privatus  vixerat,  et  rura  paterna  bobus  exercebat  suis.  Itaque  non  est  inquirendum,  sitne  nobili  genere  natus,  modo  constet  oriundum  ab  illa  Davidis  exigua  familia,  et  domo  rustica  abiecti  opilionis.  Ac  sane  scimus  Christum  venisse  in  hunc  mundum  assumpta  servi  forma  et  misero  et  ignobili  statu:  et  quasi  extra  hominum  consortium  in  stabulo  natum,  et  velut  ad  bestias  relegatum,  ut  conveniret  veritati  cum  figura.  Quare  nobis  hanc  historiam  legentibus  meditanda  est  Esaiae  sententia,  surculum  oriturum  ex  trunco  Isai.  Surculum  enim  quum  dicit,  rem  abiectam  et  contemptam  denotat  hominum  iudicio:  et  quidem  germinaturum  ait  tanquam  e