10.1:157  CONSILIA.  crucem  sublatus  suo  ipsius  interitu  genus  humanum  a  morte  sempiterna  vindicavit.  Hinc  prima  ad  vitam  resurrectio.  Cuius  participes  beatos  dicere  non  dubitavit  Ioannes  in  Apocalypsi  (20,  6)  eosdemque  a  morte  ad  vitam  transiisse  ait  cap.  5  Evangelii  (v.  24).  Qui  igitur  in  Christi  crucem  spem  omnem  salutis  suae  posuerit,  mortis  secundae  expers  erit,  ut  primae  resurrectionis  particeps.  Qui  contra  tantum  Dei  beneficium  contempserit,  is  Christum  iudicem  tam  impii  ac  contumeliosi  contemptus  habebit,  non  autem  redemptorem  a  publico  interitu.  Quod  quidem  Christi  iudicium  non  publici  facinoris  illius  sed  privati  cuiusque  vim  mortis  secundae  habebit.  Quam  ob  rem  haec  erit  secundae  mortis  origo.  Ioannes  Calvinus.  DE  COENA  DOMINI  BREVIS  ADMONITIO.1)  Satis  convenit,  repraesentari  in  sacra  coena  fidelibus  communionem  quam  habent  cum  Christo.  Neque  ea  res  controversiam  habet.  Nunc  quaeritur  significetne  duntaxat  illic  Christus,  ac  signo  externo  figuret,  nos  corporis  ac  sanguinis  sui  esse  participes:  an  re  ipsa  etiam  adimpleat  ac  praestet  quod  promittit:  nos  scilicet  sic  fieri  participes  corporis  ac  sanguinis  sui,  ut  totus  noster  fiat;  quo  omnia  eius  bona  iure  istius  communionis  ad  nos  pertineant.  Nos  vero  sentimus  ac  docemus  repraesentationem  veram  esse:  ideoque  efficaciter  illic  exhiberi,  quod  signo  visibili  promittitur.  Hoc  autem  aliter  fieri  non  potest,  quin  fideles  dum  signum  recipiunt,  corpori  ac  sanguini  Domini  communicent,  quod  est  habere  veritatem  signi.  Ac  ne  ambiguum  sit  quod  dicimus,  hic  definiendum  est  quid  sit  corpori  ac  sanguini  Domini  communicare.  Porro,  non  accipimus  pro  simpliciter  credere,  sed  pro  eo  quod  est  fide  recipere  Christum,  ut  non  tantum  in  nobis  habitet,  ac  maneat,  sed  etiam  ut  in  unum  corpus  cum  ipso  coalescamus:  sicut  Paulus  docet  nos  esse  carnem  de  carne  eius,  os  de  ossibus  eius.  Id  quum  volumus  exponere,  dicimus  spiritualiter  fieri.  Et  verbum  spiritualiter  sic  interpretamur,  ut  duo  comprehendat  :  nempe  hoc  esse  opus  mirabile  spiritus  sancti,  quod  captum  mentis  nostrae  excedit,  quemadmodum  Paulus  admiratione  correptus  exclamat,  magnum  hoc  esse  mysterium.  Deinde  manducationem  hanc  non  fieri  carnali  modo,  ut  corpus  dentibus  atteratur,  vel  ore  deglutiatur,  vel  in  alvum  descendat.  In  hunc  modum  excludimus  absurdas  omnes