27:156  cela  nous  voyons  bien  qu'il  ne  peut  souffrir  en  facon  que  ce  soit  l'idolatrie  et  les  abus.  Mais  cependant  il  regarde  aussi  a  la  fragilite  des  hommes:  car  quand  nous  aurons  quelque  obiect,  nous  serons  tantost  seduits  :  il  ne  faut  rien  pour  nous  embrouiller,  que  nous  declinerons  ou  ca,  ou  la.  Et  pourquoy?  De  nature  desia  nous  sommes  enclins  a  idolatrie:  pource  que  nous  sommes  charnels,  et  terrestres,  nous  imaginons  de  Dieu  tousiours  ce  que  bon  nous  semble,  en  le  transfigurant.  Or  si  nous  avons  occasion  la  plus  petite  qu'on  sauroit  dire,  nous  voila  incontinent  attirez  a  mal  :  si  une  mouche  nous  voie  a  travers  des  yeux,  nous  en  ferons  une  idole.  Nous  voyons  donc  a  quoy  Dieu  a  regarde,  quand  il  a  si  estroittement  voulu  qu'on  demoiist  les  autels,  qu'on  arrachast  les  bois,  que  tout  fust  brusle,  qu'on  brisast  les  statues,  et  marmousets:  car  si  cela  fust  demeure  entre  les  Iuifs,  tousiours  il  y  en  eust  eu  qui  se  fussent  adonnez  aux  superstitions  des  Payens.  Et  comment?  Si  on  avoit  devotion  a  cela?  c'est  une  chose  sacree.  Comme  auiourd'huy  ceux  qui  ont  este  nourris  en  la  Papaute,  cependant  qu'ils  verront  leurs  menus  fatras,  tousiours  ils  seront  retenus  la  dedans,  qu'ils  ne  s'en  pourront  desvelopper,  encores  qu'ils  le  voulussent  faire.  Si  un  homme  qui  aura  long  temps  ouy  la  messe,  voit  un  calice,  il  luy  semble  tousiours  qu'il  y  ait  quelque  sainctete.  Or  au  contraire  c'est  une  infection  si  villaine,  et  si  puante  que  rien  plus:  et  toutesfois  nous  ne  pouvons  concevoir  cela.  Et  pourquoy?  De  nature  (comme  i'ay  desia  dit)  nous  sommes  charnels:  et  aussi  Satan  use  de  cest  artifice,  que  quand  il  nous  vient  mettre  telles  choses  devant  les  yeux  pour  nous  seduire,  que  nous  sommes  la  entortillez:  et  ainsi  il  ne  reste  sinon  d'abolir  toutes  choses  qui  nous  pourroyent  induire  a  superstition.  Il  est  vray  que  s'il  y  avoit  ici  des  marmousets,  comme  en  la  Papaute,  quand  on  ne  les  adoreroit  point,  on  pourroit  alleguer  que  cela  ne  nous  peut  nuire.  Il  est  vray  que  de  soy  il  ne  nous  nuiroit  point:  mais  regardons  a  nous,  et  nous  trouverons  que  nous  sommes  tant  infirmes,  qu'incontinent  on  seroit  aveugle  de  tels  bagages,  et  que  ce  seroit  pour  nous  divertir  de  la  pure  parolle  de  Dieu:  s'il  y  avoit  des  autels,  encores  ne  cognoistroit-on  point  que  la  Cene  de  nostre  Seigneur  Iesus  Christ  ait  este  donnee  afin  que  nous  participions  avec  luy,  pour  iouyr  de  tous  ses  biens:  mais  il  y  demeureroit  ie  ne  say  quoy  de  mauvais  de  ce  sacrifice  infernal  qui  se  fait  en  la  Papaute,  c'est  assavoir  de  la  messe,  ou  on  cuide  que  Iesus  Christ  soit  offert  a  Dieu  son  Pere  pour  la  remission  des  pechez.  Tousiours  donc  il  en  demeureroit  quelque  phantasie  mauvaise  en  la  teste.  Voila  pourquoy  Dieu  a  si  estroittement  commande  qu'on  brise  les  statues,  qu'on  destruise  les  autels,