55:154  11.  Fide  et  ipsa  Sara.  Ut  sibi  non  minus  quam  viris  mulieres  hanc  doctrinam  communem  esse  intelligant,  Sarae  exemplum  adducit:  quam  ideo  prae  aliis  nominat,  quod  omnium  fidelium  sit  mater.  Sed  mirum  est  commendari  eius  fidem  quae  incredulitatis  palam  arguitur:  quia  angeli  vocem  velut  fabulosam  rideat.  Neque  enim  admirationis  risus  ille  fuit:  alioqui  non  tam  severe  reprehensa  fuisset  ab  angelo.  Fatendum  est  diffidentia  mixtam  fuisse  eius  fidem:  sed  quoniam  monita  diffidentiam  suam  corrigit,  nihilominus  agnoscitur  a  Deo  et  laudatur  eius  fides.  Quod  ergo  initio  reiicit  quasi  incredibile,  simulatque  audit  ex  ore  Dei  profectum,  obedienter  recipit.  Atque  hinc  utilem  doctrinam  colligimus:  quod  etiam  siqua  in  parte  vacillet  aut  claudicet  fides  nostra,  non  desinit  probari  Deo,  modo  ne  diffidentiae  nostrae  indulgeamus.  Summa  autem  est,  miraculum  quod  tunc  edidit  Deus  quum  Isaac  genitus  fuit,  fructum  fidei  Abrahae  et  uxoris  fuisse  qua  Dei  virtutem  apprehenderunt.  Quia  fidelem.  Diligenter  notandae  sunt  istae  rationes,  quae  vim  naturamque  fidei  exprimunt.  Si  quis  tantum  audiat  Saram  fide  peperisse  nondum  quid  hoc  sibi  velit  assequetur:  sed  haec  expositio  quam  apostolus  attexuit,  tollit  omnem  difficultatem.  Hanc  enim  fuisse  Sarae  fidem  praedicat,  quod  veracem  iudicavit  Deum,  idque  in  suis  promissionibus.  Cuius  sententiae  duo  sunt  membra.  Primum  enim  hinc  docemur,  nullam  absque  verbo  Dei  esse  fidem:  quia  de  eius  veritate  persuasi  non  erimus  donec  loquutus  sit.  Quod  unum  abunde  valet  ad  refutandum  sophistarum  commentum  de  fide  implicita:  semper  enim  tenenda  est  mutua  inter  verbum  Dei  et  fidem  nostram  relatio.  Sed  quia  in  Dei  benevolentia  praecipue  (ut  iam  dictum  est)  fundatur  fides,  ideo  non  quodlibet  verbum,  quamvis  profectum  ex  eius  ore,  sufficeret:  sed  requiritur  promissio  gratiae  testis.  Quamobrem  dicitur  Sara  veracem  iudicasse  Deum  qui  promiserat.  Haec  inquam  vera  est  fides,  quae  et  Deum  loquentem  audit  et  promissione  eius  nititur.  12.  Ex  uno  geniti  sunt.  Iudaeos  etiam  nunc  admonet,  fide  esse  factum  ut  sint  Abrahae  soboles.  Erat  enim  iam  quasi  semimortuus  Abraham:  Sara  uxor,  quae  in  flore  aetatis  sterilis  fuerat,  iam  senio  effoeta.  Citius  ergo  oleum  ex  lapide  fluere  debebat,  quam  ex  illis  prodire  aliquis  populus.  Atqui  innumera  multitudo  nascitur.  Si  nunc  origine  sua  superbiunt  Iudaei,  causam  attendant.  Certe  quidquid  sunt,  fidei  Abrahae  et  Sarae  tribuendum  est.  Unde  sequitur,  non  aliter  quam  fide  retinere  ac  tueri  posse  ipsos  quem  consequuti  sunt  statum.  13.  Secundum  fidem  mortui  sunt  isti  omnes  non  acceptis  promissionibus:  sed  quum  procul  eas  vidissent,  et  credidissent,  et  salutassent,  et  confessi  essent