42:154  qui  sera  a  louage,  quand  donc  l'escripture  saincte  veut  signifier  un  temps  accompli,  quelque  terme  prefix,  elle  use  de  ce  mot  d'annee.  Or  voila  donc  un  an,  c'est  a  dire  quelque  terme  accompli:  car  apres  un  an  Dieu  en  met  deux,  comme  s'il  disoit  que  quand  les  hommes  Guideront  avoir  acheve  le  terme  de  leurs  afflictions  qu'il  fauldra  recommencer,  et  que  les  afflictions  seront  prolongees  d'autant  plus,  mais  la  consolation  est  adioustee  que  quand  le  temps  aura  longuement  dure,  qu'il  sera  accourci  en  la  fin,  il  viendra  donc  en  la  moitie,  et  Dieu  sera  appaise:  voila  en  somme  ce  que  l'ange  ha  voulu  ici  signifier.  Or  ce  qui  ha  este  dit  par  l'ange  nous  le  voions  accompli,  car  depuis  ce  temps  la  iusques  a  la  venue  de  nostre  Seigneur  Iesus  Christ,  comment  est-ce  que  le  peuple  a  este  traitte?  il  y  ha  eu  d'horribles  persecutions,  comme  nous  avons  declare  par  ci  devant,  et  puis  les  troubles  ont  ils  ainsi  longuement  dure?  Il  y  ha  eu  nouvelle  matiere  de  fascherie,  que  l'Eglise  ha  este  tourmentee  environ  six  cens  ans,  c'estoit  desia  la  un  terme  bien  long,  voire  selon  les  hommes,  et  principalement  pour  ceux  qui  ont  vescu  comme  au  milieu  de  ce  temps  la:  ils  regardoient  helas!  nos  peres  ont  desia  tant  endure,  et  maintenant  les  afflictions  croissent  et  augmentent,  il  n'y  ha  nul  espoir,  que  nos  enfans  qui  viendront  apres  nous  ne  doivent  avoir  meilleure  condition  ne  meilleur  marche,  et  que  sera  ce  donc  en  la  fin,  et  Dieu  ha  il  oublie  son  Eglise,  sommes  nous  abandonnes  de  luy?  Voila  donc  comme  les  fideles  pouvoient  estre  troubles  d'une  grande  perplexite,  mais  (comme  i'ai  desia  dit)  ce  temps  la  ha  il  eu  son  cours,  c'est  a  recommencer,  car  a  la  venue  de  nostre  Seigneur  Iesus  Christ,  il  y  ha  eu  encores  plus  grandes  afflictions.  Or  il  monstre  qu'il  falloit  que  l'Eglise  se  disposast  a  recevoir  et  endurer  des  maux  plus  grands  que  iamais  elle  n'avoit  fait,  car  ce  temps  la  ha  comme  redouble  en  persecutions,  et  nous  sommes  quasi  en  ce  temps  la  selon  qu'il  plaira  a  Dieu  que  le  monde  dure  encores.  Et  ainsi  donc  nous  voions  comme  l'evenement  de  la  chose,  respond  a  cette  prophetie,  qui  ha  este  donnee  a  Daniel  par  l'ange,  et  par  la  bouche  du  fils  de  Dieu  qui  parle  maintenant.  Il  est  vray  qu'il  est  ici  parle  de  la  persecution  generale  de  tout  le  corps  de  l'Eglise,  mais  si  faut  ii  qu'un  chacun  des  membres  applique  ceci  a  soy,  et  a  son  usage,  et  de  fait  si  Dieu  n'espargne  point  toute  son  Eglise,  mais  qu'il  vueille  qu'elle  soit  suiette  a  tant  de  miseres  et  d'afflictions,  que  sera  ce  d'un  chacun  de  nous?  serons  nous  plus  privilegies,  que  ne  sera  point  tout  le  corps  de  nostre  Seigneur  Iesus  Christ,  un  doigt  aura  il  repos  cependant  que  le  corps  sera  en  tourment  et  en  angoisses  ?  Ainsi  donc  combien  qu'il  soit  parle  des  afflictions  generalles,  si  est-ce  qu'un  chacun  doit  appli-