52:152  planandum  valebat,  inserere  non  dubitavi.  Male  Erasmus,  qui  vertit  sermonem  auditus  Dei:  ac  si  Deum  intelligeret  Paulus  patefactum.  Postea  mutavit,  sermonem  quo  Deum  discebatis.  Non  enim  ab  eo  animadversa  fuit  hebraica  phrasis.  14.  Vos  enim  imitatores.  Si  hoc  ad  proximam  clausulam  restringere  libeat,  sensus  erit,  quod  virtus  Dei  vel  sermonis  eius  in  eorum  tolerantia  se  proferat,  dum  magno  et  infracto  animo  persequutione��  sustinent.  Ego  tamen  ad  totam  superiorem  sententiam  extendere  malo.  Confirmat  enim  quod  dixit,  Thessalonicenses  serio  evangelium  tanquam  a  Deo  sibi  oblatum  fuisse  amplexos:  quia  fortiter  sustineant  contrarios  Satanae  insultus,  nec  recusent  pati  potius  quam  ab  eius  obedientia  discedant.  Et  certe  hoc  non  leve  est  fidei  examen,  quum  Satan  omnia  machinando  nihil  proficit,  ut  nos  a  Dei  timore  dimoveat.  Interea  periculosae  tentationi  prudenter  occurrit,  quae  illos  percellere  vel  turbare  poterat:  nam  ab  ea  gente  graves  molestias  sustinebant,  quae  sola  in  mundo  Dei  nomine  gloriabatur.  Poterat,  inquam,  illis  hoc  venire  in  mentem,  Si  haec  vera  est  religio,  cur  eam  tam  infestis  animis  oppugnant  Iudaei,  qui  sunt  sacer  Dei  populus?  Ut  hoc  offendiculum  tollat,  primum  admonet,  hoc  eos  commune  habere  cum  primis  ecclesiis  quae  in  Iudaea  erant:  postea  Iudaeos  dicit  obstinatos  esse  Dei  et  omnis  sanae  doctrinae  hostes.  Tametsi  enim  quum  dicit  ipsos  esse  passos  a  suis  t  r  i  b  u  l  i  b  u  s  ,  id  de  aliis  quam  de  Iudaeis  exponi  potest,  certe  non  ad  solos  Iudaeos  debet  restringi:  quia  tamen  longius  in  describenda  eorum  pervicacia  et  impietate  insistit,  apparet  eosdem  notari  statim  ab  initio.  Credibile  est  aliquos  ex  ea  gente  ad  Christum  fuisse  Thessalonicae  conversos.  Atqui  ex  historia  Actorum  patet,  illic  non  minus  quam  in  Iudaea  persequutores  evangelii  Iudaeos  fuisse.  Ergo  hoc  promiscue  tam  de  Iudaeis  quam  de  gentibus  dictum  accipio  :  quia  utrique  a  suis  tribulibus  magna  certamina  et  atroces  impetus  sustinebant.  15.  Qui  Dominum  Iesum.  Quia  populus  ille  tot  Dei  beneficiis  ornatus  fuerat,  propter  veterem  patrum  gloriam  autoritate  pollebat  apud  multos  nomen  ipsum.  Ne  cui  ergo  oculos  hic  fucus  perstringat,  ita  spoliat  Iudaeos  omni  honore,  ut  nihil  illis  relinquat  praeter  odium  et  extremam  infamiam.  En,  inquit,  virtutes  quibus  laudem  apud  bonos  et  pios  merentur,  prophetas  suos  et  tandem  filium  Dei  occiderunt,  me  eius  servum  persequuti  sunt,  bellum  cum  Deo  gerunt,  cuncti  mundo  sunt  exosi,  sunt  inimici  salutis  gentium:  denique  sunt  devoti  aeterno  exitio.  Quaeritur  cur  Christum  et  prophetas  ab  iisdem  occisos  fuisse  dicat.  Respondeo,  ad  totum  corpus  hoc  pertinere:  significat  enim  Paulus  non  esse  novum  aut  insolens,  quod  Deo