42:152  ils  veulent  falsifier  le  serment  de  Dieu,  en  tant  qu'en  eux  est,  et  pourquoy?  il  est  ici  dit  que  non  seulement  Dieu  ha  prononce  qu'il  falloit  que  l'Eglise  fust  troublee  et  faschee  pour  un  long  temps,  mais  qu'il  en  ha  iure,  voila  donc  un  serment  solemnel,  et  ce  n'est  point  en  vain  que  nostre  Seigneur  Iesus  en  cette  figure,  en  laquelle  il  s'est  manifeste  a  Daniel  leve  ainsi  les  deux  mains,  et  iure,  par  le  Dieu  vivant  qu'il  faut  qu'ainsi  soit.  Quand  donc  nous  n'avons  pas  seulement  une  simple  doctrine,  mais  un  serment  solemnel  de  Dieu  qu'il  ha  ordonne  une  fois  pour  toutes,  que  son  Eglise  seroit  exercee  par  beaucoup  de  combats,  par  beaucoup  de  tourmens,  qui  est-ce  qui  osera  repliquer  contre  cela?  Ainsi  donc  pour  donner  vraye  approbation  de  nostre  foy,  que  nous  soions  munis  de  cette  doctrine,  telle  qu'elle  nous  est  monstree  en  ce  passage,  mais  en  premier  lieu  nous  avons  a  reduire  en  memoire  ce  qui  ha  este  dit  par  ci  devant,  Pourquoy  est-ce  que  Dieu  iure  ainsi,  car  il  semble  que  cela  ne  soit  pas  convenable  a  sa  maieste:  n'estoit  ce  pas  asses  qu'il  dit  le  mot?  il  est  vray  qu'il  nous  devoit  bien  suffire,  et  en  cela  voit  on  combien  les  hommes  sont  pervers,  quand  ils  ne  peuvent  point  adiouster  pleinement  foy  a  Dieu,  quand  il  parle  a  eux,  qu'il  faut  qu'il  se  abaisse  iusques  la,  de  certifier  sa  parole  en  iurant,  nous  voions  (di-ie)  l'ingratitude  qui  est  en  nous,  mais  quoy,  cependant  si  Dieu  nous  monstre  sa  bonte  inestimable,  quand  il  ne  se  contente  point  d'avoir  parle,  mais  qu'il  adiouste  le  serment  pour  plus  ample  confirmation  et  de  superabondant,  qu'il  met  son  nom  la  au  milieu,  comme  un  gage,  quand  Dieu  use  d'une  telle  facon  envers  nous,  ie  vous  prie  ne  declare  il  pas  qu'il  ne  veut  laisser  ne  mettre  en  oubli  aucun  moien,  par  lequel  il  nous  puisse  attirer,  et  puis  nous  veut  il  faire  connoistre  ses  iugements,  apres  nous  avoir  fait  sentir  sa  misericorde  a  nostre  salut,  Dieu  voiant  que  les  hommes  sont  obstines  quand  il  les  menace,  il  iure,  pour  monstrer  que  ce  n'est  point  en  vain,  et  que  ce  ne  sont  point  menaces  de  petits  enfans  (comme  on  dit).  Et  voila  pourquoy  il  conferme  aussi  ses  menaces  par  serment.  Au  contraire  quand  Dieu  nous  promet  le  salut  qui  nous  ha  este  acquis  par  nostre  Seigneur  Iesus  Christ,  pource  que  nous  sommes  tardifs  a  croire,  et  encores  que  nous  aions  quelque  foy,  elle  est  tant  debile  que  rien  plus,  et  puis  elle  se  peut  esbransler  incontinent.  Voila  Dieu  qui  ratifie  sa  parole  par  serment,  et  ainsi  quelle  excuse  pourrons  nous  avoir,  quand  nous  serons  desbauches  de  la  doctrine  de  nostre  Dieu?  O  il  est  bien  certain  qu'il  y  aura  une  confusion  extreme  sur  tous  les  rebelles,  et  sur  tous  ceux  qui  se  seront  endormis  en  ce  monde  pour  ne  recevoir  point  la  grace  qui  leur  est  presentee  de  Dieu:  pensons  donc  a  nous  mieux  que  nous  n'avons  point  fait,  mais  quoy?  ii