27:152  Gardez  de  suyvre  la  devotion  de  vos  peres.  Ouy  bien:  car  il  y  a  eu  de  deux  sortes  de  peres  entre  les  Iuifs:  il  y  a  eu  Abraham,  et  les  saincts  Patriarches,  les  Prophetes,  et  ceux  qui  ont  cogneu  le  Dieu  vivant,  et  qui  ont  servi  Dieu  en  toute  purete:  il  faloit  que  les  Iuifs  suyvissent  ceste  reigle,  et  qu'ils  s'appuyassent  la  dessus.  Et  voila  pourquoy  maintenant  Moyse  leur  dit:  Gardez  de  vous  divertir  du  Dieu  de  vos  peres:  mais  que  vous  persistiez  en  leur  foy.  Cependant  ils  avoyent  aussi  leurs  peres  qui  s'estoyent  revoltez,  qui  s'estoyent  pervertis,  et  qui  avoyent  corrompu  la  Loy,  et  avoyent  fait  un  meslinge  des  toutes  les  superstitions  des  Payens.  Pour  ceste  cause  il  est  dit:  Gardez-vous  d'ensuyvre  vos  peres:  car  ils  ont  este  pervers,  et  desloyaux  a  Dieu.  Ainsi  en  est-il  auiourd'huy.  Les  Papistes  allegueront  leurs  peres.  Mais  quoy?  Les  vrais  peres  de  l'Eglise  Chrestienne  ne  sont-ce  pas  les  Apostres?  Or  ils  n'en  veulent  point  ouyr  parler,  ne  de  tous  ceux  qui  ont  establi  l'ordre  en  l'Eglise,  tel  que  Dieu  commandoit:  mais  ils  ont  leurs  peres  bastards:  comme  ils  sont  aussi  une  semence  bastarde,  qu'ils  prendront  des  Moynes,  des  radottez  pour  leurs  peres:  et  puis  quand  ils  alleguent  des  docteurs  anciens,  s'il  y  a  quelque  folie,  quelques  superstitions  en  leurs  escrits,  ils  sauront  recueillir  tout  cela:  mais  ce  qui  sera  de  bon,  ils  le  reiettent  bien  loin.  Gardons-nous  donc  de  ceste  facon  de  paternite-la:  mais  que  nous  puissions  choisir  avec  discretion  quels  sont  les  vrais  peres,  et  que  nous  prattiquions  ce  que  dit  S.  Paul:  Que  tout  parentage  depend  de  Dieu,  et  de  nostre  Seigneur  Iesus  Christ.  Il  faut  (di-ie)  que  nous  rapportons  la  nostre  paternite,  si  nous  voulons  avoir  de  bons  peres,  que  Dieu  soit  souverain  par  dessus  eux,  et  qu'ils  puissent  testifier  qu'ils  sont  enfans  de  Dieu,  afin  qu'ils  nous  engendrent  par  ceste  semence  incorruptible  de  sa  parolle:  ou  autrement  il  n'y  aura  que  toute  confusion.  Voila  ce  que  nous  avons  a  retenir  de  ce  mot.  Or  cependant  Moyse  adiouste  aussi,  qu'il  ne  faut  point  que  les  Iuifs  a  l'entree  servent  a  Dieu,  et  puis  qu'ils  se  refroidissent:  mais  que  tout  le  temps  de  leur  vie  ils  poursuyvent,  et  qu'ils  perseverent  en  cela.  Et  c'est  comme  Dieu  veut  estre  honore  de  nous.  Car  il  ne  nous  prend  point  a  loage  pour  certaines  iournees,  pour  nous  quitter,  ou  que  nous  ayons  nostre  conge  quand  nous  aurons  acheve  nostre  terme:  il  nous  prend  a  vie  et  a  mort:  et  c'est  bien  raison,  comme  S.  Paul  le  remonstre,  quand  il  dit:  Que  nostre  Seigneur  Iesus  est  mort,  et  ressuscite,  afin  de  dominer  tant  sur  les  vivans,  que  sur  les  morts.  S'il  n'y  avoit  autre  regard  que  cestuy-la,  n'est-ce  point  assez?  Voici  le  Fils  de  Dieu  qui  nous  a  acquis  par  sa  mort  et  passion,  il  ressuscite  quant  et  quant:  ne  faut-il  pas  donc  que