9:151  151  ULTIMA  ADMONITIO  152  tueri.  Et  certe,  quum  vere  olim  dictum  sit,  audacem  esse  inscitiam,  in  hoc  praepostero  zeli  genere  ad  audaciam  accedit  haec  crudelitas.  Veris  itaque  Dei  cultoribus  cavendum  esse  praecipio,  ne  vel  causae  incognitae  patrocinium  temere  arripiant,  vel  ad  severitatem  intemperanter  [pag.  30]  ferantur.  Quia  in  causis  terrenis  merito  damnatur  iudicis  socordia,  qui  ex  aliorum  opinione,  ignarus  ipse  totius  rei,  sententiam  fert,  quanto  minus  ferendi  sunt,  qui  in  causa  pietatis  inquisitionem  supino  fastidio  negligunt?  Nec  vero  quidquam  verbis  docui,  quod  non  re  ipsa  confirmaverim.  Nam  Servetum,  nefandis  sacrilegiis  labefactantem  quidquid  est  pietatis  in  mundo,  ad  disceptationem  tamen  vocavi:  nec  solum  ad  reddendam  doctrinae  meae  rationem  paratus  veni,  sed  impurissimi  hominis  convicia  vorare  malui,  quam  malo  exemplo  causam  dare:  ne  quis  postea  obiiceret,  fuisse  indicta  causa  oppressum.  Westphalo  satis  est  magistratus  gladium  pro  disputatione  opponere.  Nempe  hominem,  cui  spes  victoriae  non  nisi  in  tenebris  est  sifa,  ita  impotenter  suppressa  doctrinae  luce  furere,  mirum  non  est.  Neque  tamen  eum  pudet  Augustini  [pag.  31]  nomen  obtendere,  ac  si  quid  simile  haberet  cum  tam  mansueto  spiritu.  Hoc  vero  mirum  est,  quum  in  hoc  libello  se  fere  ex  ore  Augustini  loqui  profiteatur,  tam  secure  in  ipso  statim  exordio  a  sancti  viri  verbis  et  sensu  discrepare.  Verba  Augustini  sunt,  ad  Vincentium  Epistola  quadragesima  octava:  Si  terreantur  et  non  doceantur,  improba  videbitur  dominatio.  Et  tamen  de  convictis  haereticis  agit,  qui  superba  tantum  morositate  impulsi  discessionem  ab  ecclesia  fecerant.  Itaque  quo  utilis  sit  terror,  adiungi  vult  salutarem  doctrinam:  sicut  etiam  alibi  dicit,  ad  Festum  Epistola  centesima  sexagesima  septima:  Non  solis  terroribus  expugnari  debere  in  haereticis  pervicaciam,  sed  mentem  quoque  et  intelligentiam  verbi  Dei  autoritate  instrui.  Et  sane  sicut  ecclesia  Dei,  fidei  suae  confessionem  [pag.  32]  ex  ore  Dei  petit,  ita  ad  eandem  regulam  ne  praepostere  feratur,  zelum  suum  temperat.  Westphalus  tamen  ne  nihil  dicere  videatur,  omnes  legitimo  iudicio  aditus  praecludens,  nos  esse  convictos  pronunciat.  Longe  aliter  Augustinus,  qui  semper  ad  errores  refutandos  accinctus  fuit,  antequam  ad  magistratus  subsidium  confugeret.  Quisquis  contra  rectam  fidem  insurgeret,  non  ante  ad  iudicis  tribunal  vocavit,  quam  praecederet  iusta  coram  populo  disquisitio.  Itaque  nihil  eum  libentius  fecisse,  quam  ut  verbi  gladio  armatus  semper  in  certamen  prodiret,  disputationum  acta  testantur.  Nec  conflictationum  taedio  unquam  fractus  est,  quin  subinde  pestilentissimos  quosque  haereticos,  teste  et  iudice  ecclesia,  coarguere  paratus  foret.  Quid  autem  Westphalus?  Ut  omnem  a  se  molestiam  uno  verbo  excutiat,  quoscunque  ipse  cum  collegis  atro  carbone  notaverit,  protinus  in  exsilium