30:151  151  HOMILIA  LVII.  152  tiam  adversus  populum  intonant?  quis  non  illos  omnem  humanitatis  abiecisse  sensum  existimet?  Denique  ex  istis  discamus,  saepe  fideles  multis  cum  difficultatibus  luctari,  quae  fidei  contrariae  videantur  :  sed  quae  tamen  cum  ea  bene  conveniant  :  ac  proinde  nos  oportere  Dei  zelo  et  studio  sic  commoveri,  ut  licet  omnem  humanum  affectum  exuisse  videamur,  tamen  ad  misericordiam  proclives  simus,  et  vel  proprio  sanguine  miserorum  pereuntium  vitam  redimere  parati.  Is  ergo  fuit  Samuelis  animus  :  neque  enim  quum  regem  Agagum  in  frusta  concidit,  crudelitate  fecit:  sed  eam  severitatem  adhibuit  quam  ipsius  officium  postulabat,  quandoquidem  ita  Deus  voluerat.  Et  tamen  illius  misertus  est,  et  pronus  ad  humanos  affectus  fuit.  Nos  itaque  singuli  hanc  doctrinam  usurpemus,  ut  peccata  oderimus,  et  quum  necessitas  postulabit  etiam,  severe  corripiamus:  et  tamen  erga  personas  bene  affecti  simus,  et  lugeamus  miseros  homines  sese  in  exitium  ultimum  coniicientes.  Iudices  itaque  si  quos  capite  damnant,  non  ira,  non  crudelitate  duci,  neque  omnem  humanitatem  exuere  :  sed  tamen  zelo  gloriae  Dei  regi  debent,  atque  omnem  naturalem  affectum  superare,  ut  officio  suo  fungantur:  et  vicissim  eorum  quos  capite  damnant  misereri,  et  ipsorum  bonum  quaerere:  quod  licet  isti  affectus  valde  repugnantes  videantur,  pulchre  tamen  conveniant,  si  modus  ille  quem  Deus  verbo  suo  nobis  praescribit  servetur.  Denique  danda  nobis  est  opera  ut  sic  nostris  affectibus  moderemur,  ut  Dei  voluntati  subiiciantur,  et  nihil  in  illis  nimium  appareat:  atque  eius  moderationis  exemplum  esto  Samuel,  quam  quidem  etsi  non  usquequaque  retinuit,  sed  tamen  sese  Dei  semper  voluntati  subiecit.  At  si  tam  excellentem  prophetam  aliquid  humani  passum  videmus,  quid  nobis  futurum  putamus,  qui  longe  ab  illa  perfectione  absumus,  ut  Deo  nos  totos  ita  dicemus  ut  nullum  alium  scopum  propositum  nobis  habeamus  quam  ut  ipsius  nomen  glorificetur?  Sane  Samuel  non  deflet  Saulem  lucri  cuiuspiam  gratia,  cui  sponte  cesserat:  neque  quod  in  gratiam  cum  illo  redire  cuperet,  aut  ipsius  divitias  speraret,  aut  viribus  confideret.  Sui  ipsius  rationem  nullam  habet,  sed  tantum  populi  commoda  et  status  tranquillitatem  intuetur.  Deinde  tantam  tamque  horrendam  Dei  vindictam  considerans  in  eum  quem  non  ita  pridem  in  regiam  evectum  dignitatem  repente  deiicit  et  exauctorat,  vehementer  tam  insignis  divini  operis  destructione  commovetur.  Non  secus  ac  si  quis  eximie  caelata  vasa  doleat  confringi,  ut  quo  fuit  vas  insignis  eo  sit  dolor  vehementior.  Samuel  vero  hic  intuebatur  ipsius  Dei  invisibili  manu  vas  factum  plus  quam  frangi  et  minui  :  quo  casu  dum  commovetur,  affectionem  suam  piam  et  sanctam  patefacit:  quae  tota  fertur  in  divini  nominis  glorificationem  et  ecclesiae  defen-