30:150  quod  dederat,  quod  ipsius  voci  non  obtemperasset:  et  posse  rebus  deploratis  succurrere,  atque  idcirco  ab  ipsius  providentia  pendendum  esse.  Sed  ista  Samuel  non  potuit  discernere;  ac  proinde  luctus  et  lacrymas  ipsius  dicemus  non  ab  infidelitate  manasse,  sed  ab  ignorantia  eorum  quae  Dominus  hic  singulariter  decreverat.  Etsi  ipsemet  supra  dixerat,  Fortem  Israelis  mentiri  non  posse  neque  duci  poenitentia:  verum,  quod  homo  erat,  veluti  nubibus  quibusdam  et  densa  caligine  prohibetur  claram  lucem  intueri:  ac  proinde  luctum  ipsius  condemnare  non  possumus  tanquam  voluntati  Dei  repugnantem,  aut  a  fidei  fundamentis  alienum.  Quin  imo  fit  nobis  hic  conspicuum,  qua  virtute  et  magnitudine  animi,  qua  constantia  prophetae  officium  fecerint,  licet  tenerrimis  affectibus  commoti  fuerint.  Nam  iussus  Samuel  Saulem  alloqui,  non  reformidabit  in  os  illi  dicere,  Deus  successorem  te  meliorem  elegit:  tu  regia  dignitate  es  indignus.  Ne  puta  Deum  non  posse  teque  tuique  similibus  carere  :  nam  sine  te  rationem  ecclesiae  suae  servandae  facillime  inveniet:  tu  vero  funditus  exscinderis  et  exstirpaberis.  En  sane  invictam  prophetae  constantiam  et  magnanimitatem,  quam  nulla  humana  affectio  vel  perturbatio  labefactavit:  sed  quae  potius  instar  angeli  cuiusdam  ista  humana  omnia  superavit.  Sane  ita  Dei  spiritus  Samuelem  ad  officium  sibi  commissum  faciendum  impulit  et  gubernavit.  Neque  tamen  id  obstitit  quominus  erga  Saulem  sese  ut  par  erat  misericordem  praebuerit,  ipsius  exauctorationem  et  abrogationem  deflens  et  lugens.  Idem  de  aliis  omnibus  prophetis  sentiendum,  quorum  idem  animus  fuit.  Nam  quum  in  improbos  homines  invehuntur  et  de  peccatis  illos  arguunt,  et  comminationibus  persequuntur,  dicas  eos  furore  potius  aliquo  quam  humano  spiritu  impelli,  et  se  homines  natos  oblivioni  tradidisse,  et  eos  quos  compellant  non  agnoscere  fratres  suos  et  propinquos  :  tanta  est  ipsorum  in  increpandis  hominibus  vehementia,  ut  quum  Dei  nomine  iudicia  ipsis  denunciant,  non  esse  amplius  homines  videantur.  Et  nihilominus  tamen  eorundem  etiam  quos  increpabant  vicem  doluisse  et  misertos  esse  conspicimus,  deque  ipsorum  salute  maxime  sollicitos  fuisse:  atque  idcirco  magnopere  affectos  quum  imminentem  in  illos  Dei  vindictam  intuerentur,  quam  lacrymis  avertere  nitebantur.  Ita  Ieremiam  audivimus  vehementer  ingemuisse  propter  propinquum  Hierosolymae  excidium,  et  in  perpetuo  luctu  iacuisse,  optantem  oculos  suos  fieri  fontem  perennem  lacrymarum  noctes  diesque  manantium.  Nam  quale  istud  votum  est  fontem  fieri  lacrymarum  oculos,  nisi  quod  ita  testatur  se  non  posse  lacrymando  et  deflendo  miserum  populi  statum  satiari,  quem  propria  morte  cupiat  redimere?  Et  tamen  quid  aliud  dicas  prophetas  spirare  quam  ignes  et  fulmina,  quoties  tanto  ardore  Dei  senten-  10*