27:150  qu'il  y  ait  eu  quelque  bon  zele,  il  sera  tantost  esvanoui.  Mais  notamment  il  est  dit:  Que  ce  sont  les  statuts  et  ordonnances  du  Dieu  de  leurs  peres.  Et  c'est  pour  mieux  confermer  le  propos  que  nous  avons  veu  ci  dessus,  que  la  terre  de  Canaan  leur  estoit  donnee  en  vertu  de  ceste  promesse,  et  de  ceste  alliance  que  Dieu  avoit  contractee  devant  qu'ils  fussent  nais.  Les  Iuifs  donc  sont  admonnestez  en  ce  passage,  d'attribuer  a  la  bonte  gratuite  de  Dieu,  l'heritage  qui  leur  a  este  promis,  d'autant  qu'ils  ne  se  peuvent  pas  vanter  que  ce  soit  une  conqueste:  car  devant  qu'ils  fussent  nais  au  monde,  Dieu  desia  l'avoit  assignee  a  leurs  peres.  Mais  cependant  si  est-ce  qu'il  les  veut  aussi  confermer  en  la  doctrine  de  la  Loy,  afin  qu'ils  sachent  qu'ils  n'adorent  point  un  Dieu  nouveau,  ou  qui  ait  este  freschement  invente,  il  leur  monstre  que  c'est  le  Dieu  qui  de  tout  temps  s'estoit  revele  a  leurs  peres:  il  y  a  donc  moins  d'excuse,  s'ils  ne  tiennent  la  religion  laquelle  avoit  este  de  tout  temps  cogneue,  voire  entre  leurs  peres.  Car  nous  oyons  ce  que  Dieu  leur  reproche  par  son  Prophete  Ieremie:  Allez  (dit-il)  circuir  par  tout  le  monde,  passez  la  mer,  voir  si  les  peuples  estranges  ont  change  leurs  dieux?  et  toutesfois  ce  ne  sont  qu'idoles.  Quand  vous  voyez  une  telle  fermete  et  constance  aux  incredules,  qu'ils  ne  sont  point  variables  en  leurs  superstitions,  mais  plustost  qu'ils  y  sont  acharnez  et  opiniastres  iusques  au  bout:  quelle  honte  vous  sera-ce,  quand  apres  avoir  cogneu  le  Dieu  vivant,  vous  l'avez  delaisse,  et  n'avez  point  persiste  en  sa  parolle?  Notons  bien  donc  en  ce  passage,  que  Dieu  reproche,  que  desia  de  long  temps  il  s'estoit  manifeste  aux  Iuifs,  et  a  leurs  peres,  afin  qu'ils  soyent  plus  a  condamner,  sinon  qu'ils  se  tiennent  a  la  doctrine  qui  leur  estoit  si  asseuree.  Mais  notons  que  ce  ne  seroit  point  assez  que  nos  peres  eussent  tenu  quelque  religion:  il  faut  quant  et  quant  qu'elle  nous  soit  approuvee.  Et  quand  il  est  ici  dit,  que  les  peres  ont  cogneu  le  Dieu  qui  a  maintenant  publie  sa  Loy:  ce  n'est  pas  le  principal  fondement  que  ceste  cognoissance-la,  ou  l'opinion  qu'auront  eu  les  peres  :  car  Dieu  presuppose  qu'il  les  a  certifiez  de  sa  parolle,  tellement  qu'ils  n'en  sont  point  en  doute.  Apprenons  donc  qu'il  nous  faut  savoir  ce  que  nostre  Seigneur  nous  declaire,  et  puis  que  nous  venions  a  l'anciennete.  Or  il  est  certain,  quand  la  religion  sera  vraye,  et  bonne,  que  elle  n'est  point  nouvelle,  qu'elle  n'a  point  este  forgee  de  nostre  temps:  mais  il  nous  faut  venir  a  ce  qui  nous  est  testifie  en  la  Loy,  et  aux  Prophetes.  La  nous  verrons  comme  Dieu  a  recueilli  son  Eglise,  comme  il  l'a  gouvernee,  comme  il  a  tousiours  eu  sa  verite,  voire  depuis  le  commencement  du  monde.  Il  est  vray  qu'il  y  a  eu  seulement  un  petit  nombre  de  gens  qui  ont  suyvi  ce  qui  estoit  10*