44:15  15  IN  SOPHONIAM  16  pro  nihilo:  hic  significat  Deum  ita  loqui,  ut  exsequutio  sit  in  eius  manu.  Sile  ergo,  inquit:  hoc  est,  Sciatis  me  non  territandi  causa  sic  loqui:  sed  quia  Deus  armatus  est  ad  vindictam  exercendam,  de  qua  nunc  vos  admonet,  ut  si  qua  sit  spes  resipiscentiae,  mature  studeatis  redire  cum  ipso  in  gratiam:  sin  minus,  ut  sitis  inexcusabiles.  Nunc  ergo  tenemus  cur  iubeat  propheta  silere  a  conspectu  Domini  Iehovae.  Et  contextus  etiam  hoc  idem  confirmat.  Additur  enim  ratio,  Quia  dies  Iehovae  sit  propinquus.  Sibi  enim  profani  homines  semper  aliquas  inducias  promittunt,  et  tempus  extrahendo  putant  se  multum  lucri  facere  :  iam  ex  opposito  deridet  propheta  hanc  securitatem:  et  dicit  diem  Iehovae  instare.  Ergo  perinde  est  ac  si  diceret  celeriter  praeveniendum  esse  eius  iudicium,  et  quidem  cum  metu  et  sollicitudine.  Postea  similitudine  ornat  doctrinam  illam,  quod  scilicet  paret  Deus  sacrificium:  imo  iam  ordinaverit,  et  sanctificaverit  suos  convivas.  Sacrificii  nomine  admonet  propheta,  ultionem  de  qua  nuper  disseruit  fore  iustam,  ut  in  ea  refulgeat  Dei  gloria.  Scimus  enim  quam  proclivis  sit  mundus  ad  querimonias:  ubi  urgetur  Dei  manu  expostulat  de  nimio  rigore:  et  multi  etiam  pleno  ore  evomunt  suas  blasphemias.  Quoniam  ergo  non  agnoscunt  Dei  iustitiam  in  poenis,  propheta  vocat  eas  sacrificia.  Scimus  autem  sacrificia  testimonia  esse  divini  cultus:  et  quisquis  Deo  immolat,  agnoscit  illum  esse  iustum.  Sic  etiam  hoc  genere  loquendi  significat  Sophonias  non  fore  Deum  crudelem  dum  urbem  Ierosolymam  et  eius  incolas  exscindet:  quia  hoc  erit  sacrificium,  quemadmodum  saepius  loquuntur  prophetae,  praesertim  Iesaias  (34,6)  ubi  loquitur  de  Bosra,  Sacrificium  paratum  est  in  Bosra.  Deinde  etiam  de  ipsa  Ierosolyma  alibi  dicit  29.  capite  (v.  1),  O  Ariel  Ariel:  ubi  vocat  ipsam  Ierosolymam  altare:  et  dicit,  Per  omnes  vicos,  per  compita,  ubique  erunt  mihi  altaria:  quia  magnos  acervos  congeram  hominum,  quos  mihi  in  sacrificium  mactabo.  Nam  quicunque  non  sunt  voluntarii  ad  praestandum  Deo  cultum,  et  quicunque  se  non  libenter  offerunt  quasi  spirituales  victimas,  trahuntur  ad  carnificinam:  et  interim  vocantur  sacrificia.  Ita  patibula  sunt  sacrificia  Domino,  ubi  plectuntur  scelerati:  quia  Dominus  armat  magistratus  gladio,  qui  coerceant  scelera,  ne  eo  prorumpant  licentiae  improbi,  ut  iam  nulla  sit  in  mundo  aequitas.  Deinde  etiam  urbes,  quae  captae  violento  impetu  stragem  aliquam  patiuntur.  Agri  etiam  ubi  caeduntur  exercitus  sunt  altaria:  Deus  enim  trahit  rebelles  ad  sacrificium,  quia  sponte  sese  non  obtulerint.  Sic  etiam  hoc  loco  dicit  propheta,  Ordinavit  Deus  sibi  sacrificium.  Ubi?  Ierosolymae,  in  tota  urbe:  quemadmodum  citavimus  ex  Iesaia.  Nam  quia  perperam  immolaverant  Deo  in  monte  Sion,  totusque  cultus  vitiatus  erat:  Deus  ipse  pronuntiat  se  fore  verum