24:15  15  COMMENTARIUS  IN  EXODI  CAP.  I.  16  erat,  ut  innoxiis  hominibus,  quibus  concessa  fuerat  libera  habitatio,  nova  tributa  imponerent.  Erat  enim  primo  loco  considerandum  qua  lege  fuissent  admissi.  Fuit  igitur  iam  per  se  iniqua  exactio,  qua  violavit  Pharao  datam  fidem,  sed  in  fine  gravius  peccatum,  quod  lucrum  non  simpliciter  quaesivit,  sed  voluit  affligere  onerum  gravitate  miserum  populum.  Nec  vero  ad  pendendum  modo  tributum  coacti  sunt  Israelitae,  sed  ad  serviles  operas,  ut  continuo  post  addit  Moses.  Quantum  ad  duas  urbes  spectat,  quo  sensu  vocentur  Miscenoth,  dubium  est.  Accipitur  hoc  nomen  interdum  pro  cellis  et  horreis,  vel  reconditoriis  omnium  rerum  quae  ad  annonam  necessariae  sunt:  verum  quia  aliquando  munitiones  quoque  significat,  non  male  conveniet  sensus:  claustra  suis  manibus  exstruere  iussos  esse,  quae  eos  arcerent  ab  exitu.  Nam  Rhameses  fuisse  in  illa  parte  regionis  sitam  constat  ex  pluribus  locis,  et  postea  videbimus  filios  Israel  ex  Rhameses  profectos  esse  (Gen.  47,  l  l  .  Exod.  12,  37.  Num.  33,  3).  12.  Quo  autem  magis  premebant  eum,  magis  crescebat  et  augebatur:  et  anxietate  constricti  sunt  propter  filios  Israel.  13.  Itaque  adegerunt  in  servitutem  filios  Israel  cum  saevitia.  14.  Proinde  amara  illis  fuit  vita  ipsorum  in  servitute  dura,  in  caemento,  in  lateribus,  et  in  omni  opere  agresti:  quia  servitium  omne  eorum  quo  serviebant  illis,  erat  cum  saevitia.  12.  Quo  autem  magis.  Conflictum  narrat  Moses  inter  Dei  gratiam  et  crudelitatem  regis  Aegyptii.  Quum  ergo  tyrannice  vexarentur  miseri  Israelitae,  Deum  illis  opitulatum  fuisse  dicit,  et  quidem  ita  potenter  ut  praevaluerit  eius  auxilium.  Ita  frustratus  est  improbum  illud  et  fraudulentum  consilium:  quod  de  ecclesia  delenda  inter  se  Aegyptii  ceperant.  Unde  et  spes  nobis  concipienda  est,  quidquid  in  nos  moliantur  impii,  fore  irritum,  quia  superior  et  victrix  erit  Dei  manus.  Sed  nobis  patienter  ferendae  sunt  afflictiones,  quia  Deus  nos  contra  pondus  nobis  impositum  vult  eniti  et  assurgere.  Quia  vero  proprium  Dei  munus  est  se  opponere  iniustis  consiliis,  ut  successu  careant,  discamus  ab  omni  fraude  et  violentia  nos  abstinere,  ne  Deum  quasi  data  opera  provocemus.  Sed  hic  locus  praecipue  ad  piorum  consolationem  valet,  ut  aequiore  animo  ad  crucis  tolerantiam  sint  parati:  quia  instructus  est  Deus  ad  ferendas  suppetias,  quibus  impiorum  furorem  demum  cedere  necesse  erit.  Quod  dixit  secunda  parte  versus,  anxios  fuisse  Aegyptios,  significat  magis  sollicitos  luisse,  quum  nihil  se  proficere  viderent,  quia  inopinata  multiplicatio  maius  discrimen  minitabatur.  Nam  quum  eos  prius  metuerent  quibus  nihil  fecerant  iniuriae,  non  mirum  est  eos  trepidare  ne  lacessiti  vicem  rependant.  Atque  hinc  utilis  colligitur  doctrina,  dum  per  horrenda  maleficia