55:149  149  CAPUT  XL  150  Hic  error  non  aliter  melius  poterit  refutari,  quam  si  consideremus  quaerendi  modum  :  neque  enim  si  extra  viam  quis  vagetur,  Deum  quaerere  putandus  est.  Hanc  porro  quaerendi  Dei  rationem  assignat  scriptura,  ut  homo  in  se  prostratus,  perculsusque  aeternae  mortis  reatu,  ac  de  se  desperans,  ad  Christum,  tanquam  unicum  salutis  asylum,  confugiat.  Nusquam  certe  hoc  reperiemus,  afferendum  esse  ullum  operis  meritum  Deo  quod  nos  apud  eum  in  gratiam  ponat.  Ergo  qui  hanc  definitionem  quaerendi  Dei  probe  tenebit,  expeditus  erit  omni  difficultate  :  quia  remuneratio  non  ad  operum  dignitatem  vel  pretium,  sed  ad  fidem  refertur.  Ita  concidunt  frigidae  illae  sophistarum  glossae:  per  fidem  placemus  Deo,  quia  merendo  intentionem  habemus  placendi.  Longe  altius  nos  apostolus  evehere  voluit:  nempe  ut  certo  secum  statuat  conscientia,  in  quaerendo  Deo  non  irritum  esse  cursum.  Quae  certitudo  longe  captum  nostrum  superat,  praesertim  quum  in  se  quisque  descendit.  Neque  enim  hoc  in  medio  ponendum  est,  Deum  iis  esse  remuneratorem  qui  ipsum  quaerunt:  sed  privatim  ad  se  quisque  usum  et  fructum  eius  doctrinae  accommodare  debet,  nempe  ut  sciamus  nos  a  Deo  respici:  tantae  illi  curae  salutem  esse  nostram,  ut  nobis  nunquam  sit  defuturus:  preces  ab  eo  nostras  exaudiri:  illum  nobis  perpetuum  fore  liberatorem.  Quum  vero  nihil  horum  sine  Christo  nobis  constet,  necesse  est  ut  semper  se  in  eum  fides  nostra  referat,  et  in  eo  solo  haereat.  Ex  his  duobus  membris  colligere  nunc  licet  quomodo  et  cur  impossibile  sit  hominem  sine  fide  placere  Deo.  Nam  omnes  nos  iure  exosos  habet  quum  maledicti  simus  natura:  nec  vero  in  potestate  nostra  est  remedium.  Quare  necesse  est  ut  nos  Deus  gratia  sua  praeveniat.  Id  fit  dum  ipsum  cognoscimus  Deum  esse,  ut  nulla  prava  superstitio  nos  alio  abducat:  deinde  quum  certam  nobis  ab  eo  salutem  promittimus.  Si  quis  pleniorem  huius  argumenti  tractationem  desideret,  hinc  faciendum  erit  exordium,  nos  frustra  tentare  omnia  et  moliri,  nisi  in  Deum  respicimus.  Hinc  enim  unicus  est  rectae  vitae  finis,  eius  gloriae  servire.  Id  nunquam  fiet  nisi  praecedat  eius  cognitio.  Sed  haec  tantum  fidei  dimidia  est  pars,  parumque  prodesset  nisi  accederet  fiducia.  Ergo  tunc  demum  suis  numeris  absoluta  est  fides,  ut  gratiam  nobis  apud  Deum  comparet,  quum  certo  confidimus,  non  frustra  nos  ipsum  quaerere,  adeoque  certam  ab  eo  salutem  nobis  promittimus.  Porro  nemo  nisi  excaecatus  superbia,  perversoque  sui  amore  fascinatus,  Deum  suis  meritis  remuneratorem  fore  confidet.  Ergo  fiducia  haec,  de  qua  loquimur,  non  in  opera  neque  in  propriam  hominis  dignitatem,  sed  in  solam  Dei  gratiam  recumbet.  Quum  autem  Dei  gratia  nonnisi  in  Christo  inveniatur,  is  unus  est  in  quem  respicere  debet  fides.