52:148  Graecis  dicitur:  sed  huic  loco  prior  sensus  melius  quadrat,  ut  sit  quasi  aucupium:  ac  si  diceret:  Non  abusus  sum  evangelio  ad  lucri  captandi  occasionem.  Quoniam  autem  tot  habet  flexuosos  recessus  hominum  malitia  ut  saepe  avaritia  et  ambitio  lateant:  ideo  Deum  testem  advocat.  Ponit  autem  hic  duo  vitia,  a  quibus  dum  se  immunem  fuisse  testatur,  debere  a  Christi  servis  aliena  esse  admonet.  Ita  si  germanos  Christi  servos  a  fictis  et  adulterinis  velimus  discernere,  ad  hanc  regulam  exigendi  sunt.  Et  quisquis  probe  Christo  servire  volet,  ad  eandem  quoque  regulam  formare  sua  studia  debet,  suasque  actiones.  Quia  ubi  regnat  avaritia  aut  ambitio,  sequuntur  innumerae  corruptelae,  ac  totus  homo  in  vanitatem  effluit:  duo  enim  sunt  isti  fontes  ex  quibus  manat  totius  ministerii  corruptio.  7.  Quum  possemus  in  pondere.  Quidam  exponunt,  quum  possemus  esse  oneri,  id  est,  vos  gravare  sumptibus:  sed  contextus  postulat,  ut  TO  j3ap��>  pro  autoritate  sumatur.  Dicit  enim  Paulus  se  adeo  abfuisse  ab  inani  pompa,  a  iactantia,  a  fastu,  ut  legitimo  etiam  iure  suo  cesserit,  quod  ad  vendicandam  autoritatem  pertinet.  Nam  quum  esset  Christi  apostolus,  maiore  quadam  reverentia  excipi  merebatur:  atqui  ab  omni  dignitatis  specie  abstinuerat  ac  si  gregarius  aliquis  fuisset  minister.  Hinc  apparet  quantum  ab  elatione  alienus  fuerit.  Ubi  nos  vertimus  mites,  vetus  interpres  reddidit,  Fuimus  parvuli:  sed  illa  quam  posui  lectio  apud  Graecos  magis  recepta  est.  Utrumvis  tamen  legas,  noa  dubium  quin  voluntariam  submissionem  commendet.  Quemadmodum  si  nutrix.  Hac  similitudine  duo  membra  comprehendit  quae  attigerat:  quod  scilicet  nec  gloriam  nec  lucrum  apud  Thessalonicenses  quaesierit.  Mater  enim  in  alendo  infante  nullum  imperium,  nullam  dignitatem  prae  se  fert.  Talem  se  fuisse  Paulus  memorat,  qui  honore  sibi  debito  sponte  abstinens  placide  se  et  modeste  ad  quaevis  officia  demiserit.  Secundo,  mater  in  liberis  suis  educandis  rarum  quemdam  et  mirificum  amorem  demonstrat:  quia  nullis  parcit  laboribus  ac  molestiis,  nullam  sollicitudinem  refugit,  nulla  assiduitate  fatigatur,  suumque  adeo  sanguinem  hilari  animo  sugendum  praebet.  Hoc  modo  Paulus  se  ita  erga  Thessalonicenses  affectum  fuisse  praedicat,  ut  propriam  vitam  in  eorum  bonum  impendere  paratus  fuerit.  Hoc  certe  non  sordidi  aut  avari,  sed  gratuito  amantis  erat:  et  hoc  in  clausula  exprimit,  propterea  quod  cari  nobis  facti  estis.  Interim  memoria  repetendum,  quicumque  inter  veros  pastores  censeri  volunt,  debere  hunc  Pauli  affectum  induere,  ut  pluris  salutem  ecclesiae  habeant  quam  suam  vitam.  Nec  privati  commodi  studio  ad  officium  agantur:  sed  sincero  eorum  amore,  quibus  se  coniunctos  et  obstrictos  esse  sciunt.