51:148  sanctitatem  electi  sunt.  Causa  certe  non  est  posterior  suo  effectu.  Ergo  electio  a  iustitia  operum  non  pendet,  cuius  ipsam  esse  causam  testatur  hic  Paulus.  Praeterea  hoc  membro  significat  electionem  non  dare  licentiae  occasionem  hominibus:  quemadmodum  impii  blasphemant,  vivamus  secure  ut  libuerit  :  nam  impossibile  est  nos  perire  si  electi  sumus.  Paulus  autem  reclamat,  perperam  separari  vitae  sanctitatem  a  gratia  electionis:  quia  eosdem  vocat  Deus  et  iustificat  quos  elegit.  Quod  autem  olim  Cathari,  Coelestini  et  Donatistae  ex  his  verbis  inferebant,  posse  nos  in  hac  vita  perfectos  esse,  nihil  habet  ponderis.  Haec  enim  est  meta,  ad  quam  toto  vitae  curriculo  contendimus.  Itaque  nunquam  ad  eam  pertingemus,  nisi  confecto  nostro  stadio.  Ubi  sunt  qui  praedestinationis  doctrinam  horrent  ac  fugiunt,  tanquam  inextricabilem  labyrinthum:  imo  qui  non  modo  inutilem,  sed  prope  noxiam  existimant?  Atqui  nulla  est  pars  doctrinae  utilior:  modo  rite  et  sobrie  tractetur,  nempe  qualiter  hic  tractatur  a  Paulo,  dum  in  ea  immensam  Dei  bonitatem  considerandam  nobis  proponit,  et  ad  gratiarum  actionem  incitat.  Hic  enim  verus  fons  est  unde  haurienda  est  divinae  misericordiae  cognitio:  quia  ut  in  aliis  omnibus  tergiversentur  homines,  electio  illis  os  obstruit,  ne  quid  sibi  arrogare  ausint  vel  queant.  Sed  meminerimus  quorsum  hic  de  praedestinatione  Paulus  disputet,  ne  alios  fines  in  disputationibus  nostris  spectando,  periculose  erremus.  In  conspectu  suo  per  caritatem.  Sanctitas  in  conspectu  Dei  est  purae  conscientiae:  quia  non  decipitur  externo  fuco  ut  homines,  sed  fidem  respicit,  hoc  est  cordis  veritatem.  Dilectionis  nomen  si  ad  Deum  referas,  sensus  erit,  Deum  solo  erga  humanum  genus  amore  fuisse  inductum  ut  nos  eligeret.  Mihi  tamen  magis  placet  cum  propinquiore  coniungi,  ut  denotet  perfectionem  fidelium  in  caritate  sitam  esse:  non  quia  Deus  requirat  solam  caritatem,  sed  quia  probatio  sit  timoris  Dei  et  obedientiae  erga  totam  legem.  5.  Qui  praedestinavit.  Quae  sequuntur,  adhuc  magis  augent  commendationem  divinae  gratiae.  Diximus  in  quem  finem  Paulus  tam  sedulo  inculcaret  Ephesiis  Christum,  gratuitam  in  eo  adoptionem,  et  aeternam  electionem  quae  praecessit.  Verum  quia  nullus  est  locus  in  quo  magnificentius  praedicetur  Dei  misericordia,  dignus  est  quem  in  primis  observemus.  In  hoc  membro  tres  salutis  nostrae  causas  exprimit:  quartam  paulo  post  subnectet.  Causa  efficiens  est  beneplacitum  voluntatis  Dei:  causa  materialis  est  Christus:  causa  finalis,  laus  gratiae.  Nunc  videamus  quid  de  unaquaque  dicat.  Ad  primam  pertinet  hoc  totum  complexum:  Deus  in  se  ipso  secundum  beneplacitum  voluntatis  suae  praedestinavit  nos  in  adoptionem  et  gratos  habuit  sua  gratia.  In  verbo  praedestinandi  iterum  ordo  no-