27:148  gouvernez,  et  qu'elle  nous  rende  agreables  a  nostre  Dieu,  quand  nostre  vie  sera  conformee  a  la  reigle  qu'il  nous  a  donnee,  et  que  nous  soyons  appuyez  sur  la  grace  de  nostre  Seigneur  Iesus  Christ,  par  laquelle  il  se  reconcilie  avec  nous,  et  nous  accepte  comme  iustes:  et  combien  que  nous  soyons  pecheurs,  si  est-ce  qu'au  nom  de  son  Fils  il  nous  recoit,  et  couvre  tous  nos  pechez,  et  nos  vices.  Voila  donc  comme  il  faut  respondre  amen,  afin  que  nostre  Seigneur  accomplisse  en  nous  toutes  les  promesses  gratuites  qu'il  nous  fait.  Il  nous  faut  aussi  respondre  Amen  aux  maledictions.  Et  pourquoy?  Car  nous  avons  tousiours  tant  de  contrarietez  en  nous,  que  c'est  pitie:  encores  que  Dieu  nous  ait  donne  un  bon  desir  de  recevoir  sa  parolle,  et  que  nous  la  recevions  de  faict,  ce  ne  sera  pas  pleinement:  car  nous  trainerons  les  iambes,  il  y  aura  tousiours  du  contredit:  nous  avons  les  reliques  de  nostre  chair:  et  puis  il  y  a  de  la  rebellion  tant  et  plus,  que  nous  sommes  comme  des  asnes,  nous  avons  besoin  d'estre  picquez  par  force.  Et  pourtant  i'ay  dit  qu'il  nous  faut  respondre  amen  aux  maledictions.  Quand  nous  voyons  que  Dieu  nous  veut  faire  passer  par  les  afflictions  de  ce  monde,  par  les  solicitudes  terriennes,  que  nous  soyons  incitez  de  venir  a  luy,  et  que  nous  cognoissions  que  c'est  pour  nostre  bien  mesmes  qu'il  nous  fait  souvent  sentir  sa  malediction.  Qui  plus  est,  que  nous  regardions:  Comment?  Si  Dieu  maudit  tous  ceux  qui  ont  transgresse  ses  commandemens:  que  sera-ce  de  moy?  Qu'un  chacun  donc  se  redargue  en  telle  sorte,  que  nous  prenions  en  patience  ce  qu'il  plaira  a  Dieu  nous  faire  endurer  en  la  vie  presente.  Voila  donc  comme  nous  devons  prononcer  les  maledictions,  voire  afin  qu'elles  ne  demeurent  point  sur  nous:  car  ceux  qui  se  solicitent  en  telle  sorte,  ils  seront  affranchis  des  maledictions.  Et  notons  cependant  que  nous  avons  le  remede  en  nostre  Seigneur  Iesus  Christ,  quand  nous  n'aurons  point  accompli  tous  les  commandemens  de  la  Loy:  car  autrement  nous  serions  tous  maudits:  comme  S.  Paul  l'allegue  aux  Galates:  Maudits  sont  ceux  qui  n'ont  point  observe  toute  la  Loy.  Il  conclud  la  dessus,  que  tous  hommes  donc  sont  maudits  de  Dieu  quant  a  leurs  oeuvres,  et  que  si  nous  voulons  estre  iustifiez  par  nos  merites,  que  nous  allions  cercher  payement  en  enfer.  Car  Dieu  a  foudroye  un  coup  sur  tout  le  genre  humain,  quand  il  a  dit:  Maudits  sont  tous  ceux  qui  n'auront  point  accompli  toute  la  Loy.  Or  nul  ne  l'a  fait.  Ceux  qui  sont  les  plus  saincts  du  monde,  encores  se  sont-ils  trouvez  redevables.  Ainsi  donc  sainct  Paul  conclud  a  bon  droict,  que  nous  voila  tous  maudits  en  nos  personnes.  Mais  il  nous  ramene  a  nostre  Seigneur  Iesus  Christ,  et  nous  monstre,  puis  que  celuy-la  nous  est  donne,  que  nous  sommes  affranchis  de  la