50:146  sua  ulna  (quod  aiunt)  alios  metiebantur.  Nam  hoc  improbis  solenne  est,  quidquid  facturi  essent,  si  daretur  facultas,  in  servos  Dei  impudenter  torquere.  Cogitur  ergo  Paulus,  ut  crimen  impudenter  confictum  a  se  depellat,  eorum  quos  misit  integritatem  tueri:  nam  si  quid  peccassent,  fuisset  ei  imputatum.  Nunc  quis  miretur  in  eleemosynis  tam  fuisse  circumspectum,  qui  tam  iniquis  iudiciis,  postquam  omnia  caverat,  premebatur  ?  Caeterum  eius  persona  nobis  sit  exemplo,  ne  tam  novum  aut  intolerabile  nobis  videatur,  si  quando  ad  similes  calumnias  respondendum  sit.  Imprimis  autem  sit  haec  nobis  religiosae  cautionis  admonitio:  ne  quam  maledicis  ansam  praebeamus.  Videmus  enim  non  satis  esse,  si  fidem  nostrae  integritatis  faciamus:  nisi  tales  deprehendantur,  quorum  usi  fuerimus  opera.  Quare  delectus  habendus  est  non  levis  neque  perfunctorius,  sed  exquisitae  diligentiae.  19.  Rursum  arbitramini.  Quoniam  anxie  prae  aliis  excusare  se  interdum  solent  qui  sibi  male  sunt  conscii:  verisimile  est,  id  quoque  versum  fuisse  in  calumniam,  quod  superiore  epistola  incubuerat  Paulus  in  defensionem  sui  ministerii.  Deinde  hoc  vitiosum  est  in  servis  Christi,  de  sua  existimatione  nimis  esse  sollicitos.  Has  igitur  duas  calumnias  ut  repellat,  primum  testatur,  se  in  conspectu  Dei  loqui,  quem  malae  conscientiae  semper  reformidant.  Secundo,  asserit  non  tam  sui  rationem  se  habere  quam  illorum.  Per  infamiam  et  bonam  famam  incedere,  adeoque  exinaniri  paratus  erat:  sed  utile  erat  Corinthiis  ipsum  retinere  existimationem  quam  merebatur,  ne  vilesceret  eius  ministerium.  20.  Nam  metuo.  Declarat  qualiter  pertineat  ad  ipsorum  aedificationem,  suam  integritatem  vendicari:  nam  eo  quod  in  contemptum  venerat,  multi  quasi  excussis  habenis  lasciviebant.  Reverentia  autem  causa  illis  fuisset  resipiscentiae:  quia  eius  monitionibus  auscultassent.  Timeo,  inquit.  Timor  hic  ex  amore  erat:  nam  nisi  illi  curae  fuisset  ipsorum  salus,  facile  id  totum  neglexisset,  ex  quo  nihil  privati  commodi  captabat:  nam  alioqui  timetur  offensio,  qmv  damnosa  fore  prospicitur.  Et  reperiar  a  vobis.  Secundus  timor,  ne  severius  agere  cogatur.  Hoc  vero  non  amoris  modo,  sed  etiam  indulgentiae  signum,  refugere  severitatem  et  lenioribus  remediis  studere.  Perinde  est  ac  si  diceret:  Quod  nunc  de  asserenda  mea  autoritate  contendo  et  in  obedientiam  reducere  vos  conor:  id  facio  ne  in  vestram  contumaciam  durius  sit  animadvertendum,  si  venero,  et  nihil  in  vobis  deprehendero  correctionis.  Ergo  suo  exemplo  docet  moderata  semper  remedia  quaerenda  esse  pastoribus,  quibus  vitia  corrigant,  priusquam  ad  praecisam  severitatem  ferantur:  et  simul  monendo  et  obiurgando  antevertendum  esse  ultimum  rigorem.  10