58:144  auquel  tend  l'histoire  presente:  car  Moise  veut  monstrer  que  Dieu,  apres  estre  apparu  a  Isaac,  lui  a  encore  declare  sa  faveur  en  ce  que  le  Roy  de  Gerar  est  venu  vers  lui,  et  qu'il  a  cerche  son  alliance  et  son  amitie:  et  en  cela  Isaac  a  este  honore,  et  mesme  ce  lui  a  este  un  grand  avantage,  pource  que  tousiours  il  pouvoit  estre  en  doute,  d'autant  qu'on  lui  avoit  porte  envie  au  pais,  et  qu'il  avoit  este  contraint  de  s'en  retirer,  encore  qu'il  y  eust  vescu  en  toute  humanite  et  douceur.  Il  pouvoit  donc  estre  tousiours  comme  en  suspend,  craignant  la  rage  de  ses  voisins.  Or  Dieu  fait  qu'ils  vienent  a  lui  de  leur  bon  gre,  et  non  seulement  se  monstrent  amis:  mais  le  flattent,  et  craignent  qu'il  ne  leur  nuise:  et  pour  ceste  cause  ils  demandent  qu'il  y  ait  alliance  contractee  entre  eux  avec  serment  solennel.  Or  ici  nous  avons  a  noter  en  premier  lieu  que  Dieu  tient  les  coeurs  des  hommes,  qu'il  amollist  leur  durete  quand  il  lui  plaist,  et  abat  toute  leur  rage,  et  la  convertit  en  humanite:  car  il  est  certain  que  le  Roy  de  Gerar  n'avoit  point  change  de  nature  quand  il  est  venu  a  Isaac:  et  d'autrepart,  s'il  craignoit  Isaac,  il  pouvoit  bien  conspirer  avec  ses  suiets  et  voisins,  et  le  fussent  venu  assaillir  ensemble.  D'autre  coste,  il  n'avoit  point  d'occasion  de  se  douter,  d'autant  qu'Isaac  ne  lui  avoit  point  donne  argument  de  se  defier  de  lui:  plustost  il  s'estoit  porte  en  sorte  qu'il  avoit  bien  monstre  qu'il  ne  demandoit  pas  fascher  aucun  mesme  de  sa  presence  :  car  nous  avons  veu  comme  il  s'estoit  retire  de  leur  compagnie.  Il  faut  donc  que  Dieu  ait  incite  ces  gens  profanes,  a  les  faire  venir  a,  Isaac,  et  se  renger  comme  ils  font,  avec  telle  humilite,  qu'ils  supplient  un  povre  homme  estranger,  lequel  n'avoit  pas  grand  credit  entr'eux,  et  n'avoit  que  sa  famille,  laquelle  il  tenoit  a  part,  sans  donner  aucun  signe  qu'il  voulust  rien  attenter.  Auparavant  Dieu  leur  avoit  lasche  la  bride,  mais  c'estoit  pour  esprouver  la  patience  de  son  serviteur.  Car  quand  on  lui  a  refuse  l'eau,  et  en  la  fin  qu'on  lui  a  dit  qu'il  estoit  le  plus  fort,  qu'on  ne  le  pouvoit  plus  souffrir:  il  n'y  a  doute  qu'alors  Dieu  ne  l'ait  exerce,  pour  voir  quelle  patience  il  y  avoit  en  lui.  Ainsi  Isaac  a  cognu,  que  s'il  eust  pleu  a  Dieu  de  lui  donner  habitation  paisible  en  ce  pais  ou  il  estoit,  qu'il  n'en  fust  bouge:  mais  d'autant  qu'il  void  les  hommes  s'eslever  a  l'encontre  de  lui,  il  sait  que  c'est  comme  son  conge  qui  lui  est  donne  de  Dieu.  Or  maintenant  aussi  a  l'opposite,  il  nous  faut  noter  que  Dieu  les  a  soudain  esmeus  de  venir  vers  Isaac,  et  d'appaiser  et  abolir  toutes  les  inimitiez  et  querelles  qui  pouvoyent  estre