52:144  9.  Ipsi  enim  de  vobis  annuntiant  qualem  habuerimus  ingressum  ad  vos:  et  quomodo  conversi  fueritis  ad  Deum  ab  idolis,  ut  serviretis  Deo  viventi  et  vero:  10.  et  exspectaretis  e  coelis  filium  eius,  quem  excitavit  a  mortuis,  Iesum,  qui  nos  liberat  ab  ira  ventura.  Dicit  celebrem  ubique  conversionis  eorum  famam  fuisse.  Quod  de  suo  ad  eos  ingressu  meminit,  ad  illam  spiritus  potentiam  refertur,  qua  Deus  evangelium  suum  illustraverat.  Dicit  vero  utrumque  apud  alias  gentes  ultro  narrari,  quasi  memoratu  dignum.  In  narratione,  quae  sequitur,  ostendit  primum  qualis  sit  hominum  conditio  antequam  Dominus  ipsos  evangelii  sui  doctrina  illustret:  deinde  in  quem  finem  nos  doceri  velit,  et  quisnam  sit  evangelii  fructus.  Nam  etsi  non  eadem  omnes  colunt  idola,  omnes  tamen  idololatriae  addicti  sunt,  atque  in  caecitate  et  dementia  demersi.  Ergo  quod  a  diaboli  imposturis  et  omni  superstitionum  genere  liberi  sumus,  Dei  beneficium  est.  Alios  quidem  cito,  alios  serius  convertit:  sed  quia  communis  est  omnium  aversio,  nos  prius  converti  necesse  est  quam  Deo  serviamus.  Hinc  etiam  verae  fidei  colligitur  vis  et  natura  :  quia  scilicet  Deo  rite  nemo  credit,  nisi  qui,  abnegata  sensus  sui  vanitate,  purum  Dei  cultum  amplectitur  ac  suscipit.  9.  Ad  Deum  viventem.  Hic  legitimae  conversionis  scopus  est.  Multos  quidem  videmus  a  superstitionibus  desciscere,  qui  tamen  hoc  gradu  facto  adeo  in  pietate  non  proficiunt,  ut  in  deterius  labantur.  Nam  deposito  omni  Dei  sensu,  in  profanum  et  brutum  contemptum  se  proiiciunt.  Sic  olim  ab  Epicuro,  Diogene  cynico,  et  similibus  derisae  fuerunt  vulgi  superstitiones:  sed  ita  ut  Dei  cultum  promiscuum  cum  perversis  ineptiis  miscerent  Ergo  videndum  est  ut  ruinam  errorum  sequatur  aedificium  fidei.  Porro  apostolusi  dum  haec  epitheta  veri  et  viventis  tribuit  Deo,  idola  oblique  perstringit,  quod  mortua  sint  et  nihili  figmenta,  et  falso  dii  nuncupentur.  Finem  conversionis  ponit  quem  attigi,  ut  Deo  servirent.  Ergo  huc  tendit  evangelii  doctrina,  ut  nos  in  cultum  obsequiumque  Dei  traducat.  Quamdiu  enim  servi  sumus  peccati,  liberi  sumus  a  iustitia:  quia  sine  iugo  lascivimus  ac  vagamur.  Quare  nemo  rite  ad  Deum  conversus  est,  nisi  qui  se  illi  totum  in  servitutem  tradere  didicit.  Sed  quia  res  est  plus  quam  difficilis  in  tanta  naturae  corruptione:  simul  ostendit  quid  nos  in  timore  Dei  et  obsequio  retineat  ac  confirmet,  nempe  Christi  exspectatio.  Nisi  enim  in  spem  vitae  aeternae  erecti  simus,  mundus  nos  protinus  ad  se  rapiet.  Quemadmodum  enim  sola  est  divinae  bonitatis  fiducia,  quae  nos  ad  Deum  colendum  inducit:  ita  sola  ultimae  redemptionis  exspectatio  facit  ne  defatigemur.  Ergo  quisquis  in  vitae  sanctae  cursu  perseverare  volet,  totam  mentem  applicet  ad  spem  adventus  Christi.  Atque  hoc  notatu