50:144  desideret.  Primum  signum  nominat  patientiam:  vel  ideo  quod  omnes  Satanae  et  hostium  insultus  generose  sustinendo,  et  nusquam  cedendo,  invictus  steterit:  vel  quod  excellentiae  suae  oblitus,  omnes  iniurias  pertulerit  aequo  animo,  taedia  infinita  devoraverit,  indignitates  patientia  vicerit.  Siquidem  tam  heroica  virtus  quasi  coeleste  est  sigillum,  quo  apostolos  suos  Dominus  consignat.  Secundum  locum  dat  miraculis.  Nam  quod  signa  et  prodigia  et  virtutes  nominat  tribus  nominibus  (quemadmodum  alibi)  rem  eandem  exprimit.  Signa  porro  vocantur,  quod  non  sunt  inania  spectacula  :  sed  quae  destinata  sunt  docendis  hominibus.  Prodigia,  quod  sua  novitate  expergefacere  homines  debent  et  percellere.  Potentiae  aut  virtutes,  quod  sunt  magis  insignia  specimina  divinae  potentiae,  quam  quae  cernimus  in  ordinario  naturae  cursu.  Porro  scimus  hunc  praecipuum  fuisse  miraculorum  finem  sub  evangelii  exordia,  ut  doctrinae  accederet  maior  autoritas.  Ergo  quo  quisque  pluribus  miraculis  donatus  fuit,  eo  magis  confirmatum  fuit  eius  ministerium,  quemadmodum  dictum  est  in  15.  capite  epistolae  ad  Romanos.  13.  Quid  est  in  quo.  Exaggeratio  ingratitudinis,  quod  in  eorum  bonum  excelluerat,  quod  fructum  perceperant  ex  approbatione  sui  apostolatus:  et  tamen  pseudoapostolorum  maledictis  assentiebantur.  Exceptionem  ironice  adiungit,  quod  illis  non  fuisset  oneri.  Nam  revera  hic  erat  cumulus  tot  beneficiorum,  quae  illis  praestiterat,  gratuito  illis  serviisse:  strenue  postea  ipsum  contemnere  ut  faciebant,  quid  erat  aliud  nisi  eius  modestiae  insultare?  Id  vero  quantae  erat  inhumanitatis?  quare  merito  tam  vecordem  superbiam  acriter  perstringit.  Condonate  mihi  hanc  iniuriam,  inquit.  Bis  enim  ingrati  erant,  qui  non  modo  eum  contemnebant,  cuius  beneficiis  erant  obstricti:  sed  probro  quoque  vertebant  illi  suam  beneficentiam.  Chrysostomus  putat  nullam  ironiam  subesse,  potius  esse  excusationis  verba:  sed  si  quis  propius  expendat  totum  contextum,  facile  perspiciet  glossam  hanc  alienam  esse  a  mente  Pauli.  14.  Ecce  tertio.  Commendat  factum  suum,  pro  quo  pessimam  gratiam  retulerat  a  Corinthiis.  Se  enim  duabus  de  causis  abstinere  dicit  ab  eorum  facultatibus,  quod  eos  quaerat,  non  eorum  opes:  deinde  quod  patris  officium  erga  ipsos  velit  facere.  Hinc  apparet  quam  laudem  mereatur  eius  modestia,  quae  contemptum  illi  pariebat  apud  Corinthios.  Non  quaero  quae  vestra  sunt.  Yeri  probique  pastoris  officium,  non  lucrum  ex  ovibus  quaerere,  sed  ovium  salutem.  Quamquam  notandum  est,  non  ita  quaerendos  esse  homines,  ut  quisque  suos  sibi  discipulos  habeat.  Malum  est  lucro  esse  addictum,  aut  quaestus  faciendi  causa  pastoris  munus  obire:  sed  discipulos  abducere  post  se  ambitionis  causa  multo  peius.  At  Paulus  intelligit  mercedem  se  non