42:144  bien  prendre  courage  en  ce  mot  ici,  ce  n'est  point  peu  de  chose,  que  Dieu  nous  face  la  grace  que  nous  iustifions  ceux  qui  sont  damnes,  quand  a  nous  il  n'y  ha  que  toute  iniustice  en  nostre  nature,  nous  sommes  tous  pauvres  pecheurs,  et  que  Dieu  nous  exalte  et  nous  magnifie  en  telle  sorte  qu'il  veut  que  nous  iustifions  les  autres,  il  n'y  ha  que  puantise  et  infection  en  nous,  et  Dieu  veut  que  nous  soions  les  vaisseaux  de  iustice,  et  ie  vous  prie  cela  ne  nous  doit  il  pas  bien  enflamber,  a  ce  que  nous  mettions  peine  d'instruire  nos  prochains?  Et  c'est  ce  que  dit  sainct  Iaques,  quiconques  aura  reduit  son  prochain  et  l'aura  converti  de  ses  peches,  que  celuy  la  ha  gaigne  une  ame  a  salut.  Voila  les  ames  qui  ont  este  si  precieuses  a  Dieu,  qu'il  les  ha  rachetees  par  le  sang  precieux  de  son  fils,  elles  s'en  vont  en  perdition,  et  Dieu  nous  donne  la  grace  de  les  ramener  a  salut.  Quand  donc  nostre  Seigneur  nous  fait  un  tel  hommage,  et  si  inestimable,  faut  il  que  nous  soions  paresseux  de  nostre  coste?  Voila  le  premier  article  que  nous  avons  ici  a  noter,  que  puis  que  Dieu  se  sert  de  nous,  a  une  chose  tant  honorable  que  nous  iustifierons  ceux  qui  sont  damnes,  que  nous  les  presentons  a  Dieu  comme  sacrifices  de  bonne  odeur,  sacrifices  plaisans,  puis  qu'ainsi  est  que  Dieu  se  veut  servir  de  nous  en  cela,  que  nous  ne  facions  point  dificulte  de  nous  y  emploier,  que  ce  mot  ici  nous  solicite  et  nous  serve  d'esperon,  quand  nous  serons  paresseux  en  nostre  office.  Or  nous  avons  aussi  a  recueillir  tous  en  commun  une  bonne  doctrine  et  utile  de  ce  passage,  c'est  a  scavoir  que  quand  nous  profiterons  en  l'Evangile,  que  voila  nostre  iustice  devant  Dieu.  Or  nous  ne  pouvons  pas  parvenir  a  cette  iustice  ici  iusques  a  tant  que  nous  aions  conneu  que  nous  sommes  pecheurs  et  du  tout  damnes,  qu'il  n'y  ha  qu'iniustice  en  nous,  car  celuy  qui  cuide  estre  iuste,  qui  pense  avoir  quelque  vertu  en  soy,  celuy  la  se  ferme  la  porte,  que  iamais  ne  parviendra  a  la  iustice  de  l'Evangile:  commencons  donc  par  ce  bout,  c'est  a  scavoir  que  nous  soions  confus  en  nousmesmes,  que  nous  baissions  la  teste,  connoissans  nostre  malheurte,  et  quand  nous  aurons  conneu  cela,  sachons  alors  que  Dieu  ne  nous  veut  point  laisser  en  telle  misere,  mais  qu'il  y  remedie  par  ce  moien,  c'est  a  scavoir  que  nous  sommes  reduits  et  reconcilies  a  luy,  quand  nostre  Seigneur  Iesus  Christ  nous  appele,  qu'alors  nous  sommes  iustifies,  et  pourquoy?  est-ce  que  cette  simple  connoissance  nous  iustifie,  quand  nous  aurons  comprins  en  nostre  cerveau,  ce  qui  est  monstre  en  l'Evangile?  nenni  non,  mais  c'est  d'autant  que  Dieu  nous  presente  sa  grace,  au  nom  de  nostre  Seigneur  Iesus  Christ,  car  la  nous  avons  certitude  de  la  remission  de  nos  peches,  que  la  nous  avons  tesmoignage  que  Dieu  nous  veut  gouverner  par  son  sainct  Esprit,  qu'il  nous  veut