30:144  deserti  ingressu  proficiscentes  in  terram  promissam  Israelitas  prohibere  transitu  conati  fuerant,  quo  tempore  nondum  erat  Agagus  natus.  Ex  quo  fit  conspicua  Dei  vindicta  in  illud  peccatum  quod  obliteratum  videbatur,  et  perpetua  oblivione  deletum:  quae  tamen  etiam  peccata  tam  ipsius  Agagi  quam  maiorum  complexa  est.  Haec  varo  quo  melius  a  nobis  menti  comprehendantur,  observandum  quod  Deus  Abrahamo  dixerat:  Amorraeorum  iniquitates  nondum  venisse  ad  iustam  mensuram  et  cumulum.  Deus  tum  adversus  populos  in  quorum  medio  vivebat  Abrahamus  fert  sententiam:  qui  sane  dignissimi  iam  tum  erant  punitione,  si  ex  iudicii  sui  severitate  voluisset  cum  ipsis  agere:  verumtamen  Deus  nondum  impletam  ipsorum  mensuram  ait,  et  nondum  impletum  vindictae  tempus:  quasi  diceret,  illos  nondum  ad  maturitatem  venisse,  sed  loco  et  tempore  puniendos.  Atqui  plus  quam  ducenti  quinquaginta,  immo  plus  quam  tercentum  anni  lapsi  erant,  ex  quo  Deus  ipsis  comminatus  fuerat.  Nam  quadringenti  et  triginta  anni  intercesserant  a  prima  promissione  facta  Abrahae,  ad  exitum  usque  populi  ex  Aegypto.  Sed  quomodo  dicit  se  illos  puniturum,  quum  tantum  temporis  effluxerit?  In  lege  sane  Deus  dicit  se  puniturum  iniquitatem  patrum  in  filiis  usque  in  tertiam  et  quartam  generationem.  Ex  quibus  apparet  Deum  punire  mortuos  in  ipsorum  progenie,  et  patienter  eos  qui  iam  tum  digni  erant  internecione  tolerare:  quibus  etsi  videtur  ignoscere,  non  tamen  ignoscit,  sed  patienter  tolerando  condemnationem  ipsorum  aggravat,  si  perstiterint  in  pervicacia  et  obstinatione.  Quod  si  corpoream  vindictam  illos  effugere  contigerit,  tanto  magis  horrendam  animis  ipsorum  reservari  certum  est.  Caeterum  quum  liberos  illorum  post  lapsos  annos  tercentum  a  lata  sententia  ulciscitur,  nemini  tamen  iniuriam  facit.  Nam  quum  et  illi  Dei  spiritu  destituantur,  peccata  peccatis  cumulant,  et  malum  malo,  et  in  peius  semper  ruunt,  donec  ad  summum  iniquitatis  cumulum  devenerint,  cuius  vindicta  differri  amplius  non  possit.  Ex  quo  fit  manifestum:  Deum  non  ita  ulcisci  peccata  patrum  in  liberis,  ut  ipsi  sint  innocentes  et  iusti:  et  insontem  non  luere  poenas  pro  sonte:  sed  Deum  tanta  semper  aequitate  et  iustitia  sua  iudicia  dispensare,  ut  peccatorem  puniens  post  ducentos  annos,  aequissima  tamen  semper  illa  sit  punitio,  et  non  possit  qui  plectitur  conqueri  se  pro  alterius  peccato  poenas  sustinere,  quum  sibi  satis  sit  culpae  conscius.  Sic,  exempli  gratia,  quum  Chananaei  ab  Israelitis  caesi  fugatique  sunt,  etsi  diu  dilata  sententia  fuerat,  non  poterant  de  ea  conqueri,  quod  digni  essent  qui  funditus  exstirparentur:  ut  si  quis  defensionem  illorum  susciperet,  dedecore  obrueretur,  quod  Dei  iudicia  semper  iustissima  reperiantur.  Idem  in  Agago  conspicuum:  quem  Samuel  dignas  factis  suis  poenas  luiturum  ait,  quod