27:144  garenne  de  dieux:  que  nous  savons  les  idoles  qu'ils  se  sont  forgez.  Et  d'ou  vient  cela?  C'est  qu'apres  que  les  hommes  ont  cogneu  Dieu,  ils  ne  l'ont  point  voulu  glorifier:  mais  se  sont  esvanouis  en  leurs  pensees:  comme  ils  se  sont  notamment  destournez  de  luy.  Et  quand  Dieu  a  donne  sa  Loy,  il  y  a  eu  une  benediction  plus  obscure  qu'il  n'y  a  point  auiourd'huy  du  temps  de  l'Evangile.  Voici  Dieu  qui  non  seulement  se  dit  createur  du  ciel  et  de  la  terre:  mais  pource  qu'il  est  incomprehensible,  que  sa  maieste  surmonte  tous  nos  sens,  il  veut  que  nous  le  contempiions  en  son  image  vive,  c'est  assavoir  en  nostre  Seigneur  Iesus  Christ.  Voila  le  Fils  de  Dieu  qui  s'est  declaire  a  nous  tant  privement,  que  nous  pouvons  estre  assez  asseurez  que  nous  adorons  le  Dieu  vivant,  que  nous  cognoissons  que  toute  plenitude  de  gloire  et  de  Divinite  gist  en  luy.  Et  voila  pourquoy  aussi  le  Prophete  Isaie,  quand  il  en  parle  dit:  Le  voici,  le  voici  nostre  Dieu.  Si  cela  a  eu  lieu  entre  les  peres,  qu'il  ait  fallu  qu'ils  ayent  eu  une  telle  certitude  mesmes  du  temps  de  la  Loy,  et  que  Dieu  n'ait  point  voulu  que  son  peuple  fust  en  doute,  ains  qu'il  fust  certifie  autant  qu'il  estoit  expedient,  et  utile:  nous  devons  auiourd'huy  estre  encores  plus  asseurez.  Car  nous  avons  une  declaration  bien  plus  ample  en  nostre  Seigneur  Iesus  Christ,  tellement  que  la  voix  du  Prophete  Isaie  doit  resonner  en  nos  aureilles:  Le  voici,  Ie  voici  nostre  Dieu:  que  nul  ne  se  destourne  de  la,  qu'il  n'est  plus  question  de  vaguer,  ne  chanceller  de  coste  et  d'autre:  mais  que  nous  sachions,  et  soyons  asseurez  d'avoir  le  comble,  et  la  perfection  de  toute  sagesse,  quand  nous  pourrons  nous  tenir  a  Iesus  Christ,  et  a  ce  que  sa  doctrine  nous  monstre.  Or  cependant  nous  voyons  comme  le  povre  monde  tracasse  ca  et  la,  et  qu'un  chacun  trotte  en  son  chemin,  c'est  a  dire,  qu'un  chacun  veut  errer:  et  cependant  nous  ferons  un  bouclier  d'ignorance,  apres  que  nous  aurons  ainsi  ferme  les  yeux  a  la  clarte,  que  nous  aurons  bouche  nos  aureilles  a  la  doctrine  de  salut,  que  nous  aurons  tourne  le  dos  a  celuy  qui  nous  monstroit  la  face:  et  quand  il  nous  tendoit  la  main,  que  nous  aurons  crache  a  l'encontre,  nous  irons  encores  prendre  excuse  la  dessus.  Voila  ce  que  nous  avons  a  retenir  de  ce  passage,  quand  ici  Dieu  reproche  aux  hommes,  que  quand  il  leur  aura  annonce  sa  parolle,  s'ils  s'en  destournent,  c'est  par  une  rebellion  diabolique,  et  qu'ils  sont  conveincus  en  euxmesmes  d'adorer  les  dieux  qu'ils  n'ont  point  cogneu.  Car  nostre  foy  ne  doit  point  estre  incertaine,  elle  ne  doit  point  estre  une  opinion,  ou  un  cuider:  mais  il  faut  qu'elle  emporte  science  avec  soy.  Et  quelle  science?  Il  est  vray,  quant  est  de  nostre  sens  et  raison,  si  nous  voulons  approcher  de  Dieu,  il  nous  le  faut  adorer  en  humilite,  et  cognoistre